Guwahati, Nailar 02: Ka jingshlei um ka la syllad biang ia ki bynta ka Assam ha ka sien ka ba lai hynnin ka sngi Nyngkong, bad ka jingther jong u ‘lapbah ka la jia ha ki ba bun jaka bad ktah ia kumba 35,000 ngut ki nongshong shnong hapoh ki sawtylli ki district.
Katkum ka jingpyntip na ka liang ka central water commission (CWC), la ong ba ka wah Brahmaputra ha ryngkat ki phra tylli ki shnat wah jong ka ki la pyni ia ka dak jong ka jingkiew um. Ka CWC ka la ong ruh ba ka jingdon um hapoh Brahmaputra ha Tezpur kan nangkiew mynta ka sngi ba Ar.
Ka wah Puthimari, Pagladiya, Beki bad Sankosh ruh ki lah ban nang kiew ha ka jingdon um ha kine ki 24 kynta ki ban wan.
Katkum ka commission, ka wah Pagladiya bad Beki ha ki bynta shathie ka Assam ki la tuid palat ia u dak jingma, katba ka wah Brahmaputra ka la tuid palat ia u dak jingmaham ha ki bynta jong ka Neematighat bad Tezpur hynnin ka jan miet sngi Nyngkong.
Shuh shuh na ka liang ka IMD ka la pynpaw ruh ba kan don ka jingjingkhie ‘eriong ha ryngkat ka leilieh bad ka jingtied u pyrthat nalor u slap u ba jur ha ki ba bun jaka hapoh ka thain Northeast kat haduh kane ka sngi Thohdieng ka ban wan.
Na ka liang ka State Disaster Management Authority (ASDMA) ka Assam la ong ba ka district Bajali, Chirang, Darrang, Dhemaji, Jorhat, Lakhimpur, Nalbari, Tamulpur bad Udalguri district ki la shah ktah jur ha kane ka jingshlei um.
