Guwahati, Nailar 02: Ki laingut ki MLA Congress na Jharkhand ia ki ba la kynnoh ba ki la shah kem ha ryngkat ka pisa kumba T.50 lak na Howrah, Bengal la ong ba ki la leit ban iakynduh ia u Myntri Rangbah (CM) ka Assam u Himanta Biswa Sarma ha ka nongbah Guwahati, ong ka lad pathai khubor.
Ka khubor ka iathuh ba kine ki laingut ki MLA ka Congress na Jharkhand ki ba la shah kem ki la leit ban iakynduh ia u CM Himanta Biswa Sarma ha Guwahati ha ka ba ki la ioh pdiang ia ka pisa T.50 lak lyngba uwei u nongkhaii ka thain ha Kolkata.
Ki bor pulit ka West Bengal ha ka 30 tarik u Naitung ba la dep ki la kem noh ia laingut ki nongthaw ain ka Congress ki ba kynthup ia u Irfan Ansari, u Rajesh Kachchap bad u Naman Bixal Kongari na Howrah katba ki dang don hapoh ka kali ha ryngkat ka pisa kumba T.50 lak.
Kham hadien na ka liang ka party Congress ka la sospon noh ia kine ki laingut ki ba don mynta hapdeng ka jingshah set hapoh ka jingkhmih ka tnat CID ki pulit ka Bengal.
Hadien ka jingshah kem jong kine ki laingut, na ka liang u general secretary ka Congress u ba dei khmih ia ka Jharkhand, u Avinash Pande u la kynnoh ia ka BJP halor ka jingpyrshang ban pynkhyllem ia ka sorkar ka JMM-Congress hapoh Jharkhand.
“Ka la don ka jingpyrshang naduh kine ki ar snem ba la dep ban pynkhyllem ia ka sorkar hapoh Jharkhand, bad na ka por sha ka por, ki nongmihkhmat ki la shah phone, shah byrthen bad shah thong tyngka,” kynnoh une u nongialam Congress.
Nalor kata na ka liang u Pande u la kynnoh ruh ba wat na ka liang u CM ka Assam u la phone da lade hi ia ki MLA ka Jharkhand ha ka jingpyrshang ban pynkhyllem sorkar.
Kham hashwa, na ka liang u Kumar Jaimangal Singh u ba dei u MLA ka Congress na Bermo hapoh Jharkhand u la kynnoh ba ki para MLA ki jong u ki ba la shah kem noh ha Bengal ki la kyntu ia u na ka bynta ban leit iakynduh ia u CM ka Assam u Himanta Biswa Sarma ha Guwahati ha ryngkat bad ki.
U Singh u ba la phah da ka jingujor hapoh Argora police station ha Ranchi pyrshah ia kitei ki MLA bad ia u CM Sarma u la kynnoh ba u la shah kular na ka bynta ban ioh bat ia ka kyrdan Myntri nalor ka pisa ka ba da ki klur tyngka lada ki la lah ban pynkhyllem noh ia ka sorkar ka JMM-Congress hapoh Jharkhand.
Ha katei ka jingujor, u Singh u la kynnoh ba u la shah kyntu ha kitei ki MLA ka Congress ki ba la shah kem ba kin wan sha Kolkata bad ban ia mih ryngkat lang ban leit sha Guwahati.
