Shillong, July 3: Ka Shillong Sports Association’s Women’s League kaba la long hynne ka Lah Sngi U Blei, ka la sakhi ia ka jingiathep bun kol ha baroh artylli ki jingiakhun kaba la pynlong ha madan Polo.
Ka Laitkor SC kala pynliem iaka Kick Start Football Coaching Centre da 7-0 katba ka PFR Football Academy kala pynrem da 4-1 iaka Lawei Smit SC haka Group A.
Ka Laitkor bad ka PFR mynta ki don mar 9 point na ki laisien jong ka jingiakhun hynrei ka Laitkor kala jam shakhmat na ka jingiapher haka jingioh thep bun kol.
Ka Iawanlang Nongbet jong ka Laitkor kala ioh iaka hat-trick da kaba thep iaka kol ha ka minit kaba 2, 47 bad 57, katba ka Nisilia Majaw kala ioh thep ha ka minit kaba 7, ka Tracy Rympei ha ka minit kaba 13 kala ioh thep shi kol bad ka Iaraplang Nongrum kala ioh thep ha ka minit kaba 30 bad 40.
Ka Betsheba Kharsyntiew jong ka PFR kala ioh thep ia ka kol haka minit kaba 10 lyngba ka free-kick katba ka Ibashisha Khongwet kala thep ia ka kol ha ka minit kaba 25 lyngba ka penalty.
Ha ka minit kaba 29 ka Khongwet kala ioh ban thep ia ka kol bad ha ka minit kaba 33 ka Ridalin Suting kala ioh ban thep iaka kol kaba long 4-0 ha ka jingiakhun haka kylla step.
Ka PFR ka mshym la lah ban thep kol biang haka kylla miet hynrei ka Lawei, kala ioh ban thep shi kol lyngba ka free kick kaba la shut da ka B Nongrum kaba la leit dei iaka nongialehkai shadien jong ka PRF bad run gshapoh kol.
Ha ka sngi Baar ka jingiakhun ha ka Group B kan long hapdeng ka Mawlai SC kaba dang bat iaka nam ‘Champion’ pyrshah iaka Synroplang 77 ha ka por 2:30 mynsngi bad hadien kane ka Lumparing kan iakhun pyrshah iaka Maw U-tieng ha ka por 4:15 mynsngi.
Pule ruh: Yn mihkhmat ka Saiden SS, Mynken Christian HSS sha ka State Level Subroto Cup na Ri-Bhoi
