Shillong Nohprah 12 : La kan dei ka Nongkseh lane ka Shillong Lajong, kawei ka kynhun kan ioh shadkmen kum bym pat ju shadkmen mynno mynno ruh ha ka janmiet sngi Saitjain katba kawei pat kan mad ia ka jingkut noh ka samoi ialehkai ba khlem shah rem, kaba la iaid da ki bnai namar kan don tang kawei ka nongjop lashai janmiet haba pynkup ia ka painsngiat kum ka namtam ne Champion jong ka SSA Champions Cup 2025.
Ka jingiakhun phainal hapdeng kine ki artylli ki kynhun ki bym pat mad ia ka jingshah rem ha ki lympung ialehkai ka SSA mynta ka samoi, kan sdang ha ka por 4:30 baje janmiet ha madan SSA Stadium, Polo. Namar ba ka dei ka final, kawei ka kynhun kan hap ban shah rem bad kawei pat kan hap ban jop.
Kine ki arkynhun kila dep iakynduh teng ha kane ka lympung ialehkai namar ka jingiadonlang ha ka Group B bad kane ka jingiakhun kala kut ha ka jingiakhaid ba mar 1-1 kol. Ka jingiakhun hapdeng jong ki, kala pyndap smam ia ka madan SSA Stadium ha ka janmiet 4 tarik Nohprah katno tam kan long lashai ka sngi kaba la khring ym tang ia ki nongkyrshan jong kine ki kynhun hynrei wat ia ki riewieid phutbol kiba ju kyrshan ia kiwei ki kynhun.
Kum ka kynhun ba ialehkai ha ka lympung ba hehduh ka SSA- ka Shillong Premier League (SPL), ka Shillong Lajong kam shym la lah ban pynneh ia ka nam kum ka lahduh na u snem 2024 bad pyndep ia ka SPL ha ka kyrdan kaba ar hadien ka Langsning. Kane ka jingduh ka Shillong Lajong ia ka nam lahduh ka SPL 2025 dei namar ka jingiakhaid ka jingiakhun ba khatduh pyrshah ia ka Nangkiew Irat.
Ka Shillong Lajong kala wan ba-ar bad ka dei ka kynhun ka ba khlem shah rem ha ki 9 tylli ki jingiakhun ka SPL, 2025 da kaba jop ia 5 tylli bad iakhaid 4 tylli ki jingiakhih. Hynrei ka Lajong kala ioh consolation da ka jingiohrah ia ka SSA Super Cup ba thymmai.
Ha ka Champions Cup, ka Lajong kala jop ia lai tylli ki jingiakhunka Group B bad iakhaid tang ha ka jingiakhun pyrshah ia ka Nongkseh. Ka Lajong kala ioh rung suk sha ka final da ka jingjop da 2-0 kol pyrshah ia ka Meghalaya Police ha ka sngi Balang. Kane kala pynlong ia ka kynhun ban ym pat shah rem haduh 16 tylli ki jingialehkai haba khmih naduh ba sdang ka SPL ha u bnai Nailar.
Haba phai pat sha ka Nongkseh, ka kynhun ruh kala pyni ia ka jingialehkai kaba khlain bad kaba iakot bor mat katjuh bad kiwei pat ki kynhun kiba ialehkai ha ki lympung ka Shillong Sports Association. Ka kynhun kala ialehkai ha ka 1st Division bad kala ioh ia ka jingjop ha baroh khyndai tylli ki jingiakhun ban ioh rah syndon ia ka nam lahduh bad kiew sha ka SPL ha ka samoi ban wan. Ka Nongkseh kala shah thep tang 2 kol ha kine ki jingiakhun.
Namar ka Super Cup ka dei tang ia ki kynhun ka Shillong Premier League (SPL), ka Nongkseh kam shym la ioh ia ka lad ban iatynjuh bor ha kane ka lympung.
Ha ka Champions Cup, ka Nongkseh kala jop 3 sien bad iakhaid tang shisien kata pyrshah ia ka Shillong Lajong ha ka Group B. Hynrei, dei ka jingiakhun semifinal pyrshah ia ka Langsning ha ka sngi Ba-ar, kaba dei ka test ba khatduh ia ka kynhun ban pyni ia ka jingkhlain jong ka.
Ka Langsning kaba la jop ia ka SPL haduh lai sien, kala sdang da ka jingioh thep ia artylli ki kol hapoh ka 20 minit hynrei ka Nongkseh kala pyni ia ka jingdon ia ka mynsiem ialeh bad kala lah ban pyniakhaid ia baroh ar kol tang hapoh ka 30 minit jong ka jingiakhun. Kane ka jingiakhun kala poi sha ka jingiashut tie breaker ha kaba ka Nongkseh kala ioh ia ka nam jop da 4-3 kol.
Ka Nongkseh ka la sei bun ki rangialehkai donsap ha kane ka samoi, bun na ki ki dei kiba la mad ia ka I-League bad kiba la ih bha. Ki bun kiwei ruh kiba kham paw, hynrei kiba kham tbit ki dei u Chesterpaul Lyngdoh, Kynsaibor Lhuid, Kitboklang Pale bad u Hardy Cliff Nongbri, kiban hiar thma na sha khmat. U Mebankhraw Wahlang, Banpynkhrawnam Nongkhlaw bad u Banskhemlang Mawlong, ki ruh ki long kiba kyrpang ban hiar thma ia ka Lajong. U Daraphun Talang, uba la ioh ban khanglad ia ka penalty haba jop pyrshah ia ka Langsning u la ap kol bha wat hadien ba u la shah thep ar kol hashuwa kane.
Na ka bynta ka Lajong, u Riborlang L Lyngkhoi u la sdang ia ka tournament da ar tylli ki hat-trick, hynrei hadien kane u la kynjah jar. Hynrei ki don kiwei ruh kiba tbit kum u Babysunday Marngar bad u Deibormame Tongper, kiba lah ban pynma ia ka kynhun ba iakhun pyrshah. U Iohborlang L Lyngkhoi, u dei sa uwei bad u Samchaphrang Lato ruh uba tbit ba ialehkai napdeng (midfield), u Wilbert Marbaniang u donsap ha bak bad ka jingtbit jong u Wanteilang Malngiang ha kol, kaba mut ka Lajong kan aireng tikna ia ka Nongkseh.
Ha ka jingialang bad ki lad pathai khubor mynta ka sngi Thohdieng, baroh ar ki kynhun -ba la mih khmat da u Wilbert bad manager Lekini Suting na ka Lajong bad u Hardy Cliff bad u coach Richard Nongneng na ka Nongkseh – ki la ong ba kin mih madan beit kumjuh kumba ju ialehkai, ban pynbyrngia ia ki nongkyrshan kumba ki la leh ha kine ki bnai ba la leit.
Ka kynhun kaban iohrah ia kane ka SSA Champions Cup 2025 kin ioh khung ia ka song pisa kaba 8 lak tyngka, kaba dei ka khusnam kaba heh tam ha kino kino ki football tournament ha Meghalaya. Katba kaba wan baar kan ioh ia ka khusnam pisa kaba 4 lak tyngka.
Wat khlem kato ka cheque, ka jingiakhun jong ki ka dei ia ka trophy, ka burom, ka jingkmen jong ki nongkyrshan jong ki bad ka jingsngewsarong naka bynta ki player bad ki support staff, kaba ki la buh thong baroh shikatta.
Na ka bynta ki club, baroh ar ki la don la ki jong ki history kiba jrong ha ka sport, hynrei ka rekod jong ka Lajong khlem artatien ka kam bun. Ka Nongkseh ka la dep pynpaw lypa shuwa kane mynta ka samoi bad kin ot ia u cake jong ki da kaba jop la shai ka sngi. Hynrei ka Lajong ruh kan ym ailad satia na ka bynta ka burom jong ki, kaba la trei shitom bad jop ia ki jingiakhun da ki snem mynta, naba ka long kawei na ki kynhun ba khlain ha Meghalaya, kaba baroh ki kwah ban pynliem ia ka.
