Shillong, Nailur 30: Ka Langsning FC ka la hap ban da jaw syep jaw syar ban lah ban pynliem da ka said ia ka Nongrim Hills SC da 3-2, ha ka jingiakhun ka Shillong Premier League 2025, ka SSA, ba la long ha SSA Stadium, First Ground, Polo hynne ka nohphai sngi.
Ia ki kol ka Langsning FC la thep ia ki da u Richie Kharbani (32′), Apborlang Kurbah (34′) bad Istarbor Marngar (90’+6), katba ia ki kol ka Nongrim Hills la thep ia ki da u Sanborlang Sohtun (79′) bad sa shi kol ka dei ka own goal, kaba kren shai ba haduh katno kane ka jingiakhun ka long kaba iakhaid bha.
Da kane ka jingjop, ka kynhun ialehkai ka Langsning FC kan kiew sha ka kyrdan kaba lai hadien ba ka la ioh ba kan khur 11 point, katba ka Nongrim Hills, ka dang lah ba kan khur tang shi point na ki hynriew sien iakhun ba ka la dep.
Ka khana jong kane ka jingiakhun ka long ba kine ki ar kynhun, ki la lah ialehkai bha ha madan, ha kaba la don ruh ki khep ba ki la jan ioh ia ki kabu ban ia pynkhih ia ka jar, katno tam lei lei na ka kynhun ialehkai ka Nongrim Hills, kaba donkam ba kan ialehkai bha bad ban lah ruh ban ioh khur ia ka jingjop.
Pynban hapoh ki ar minit, ka kynhun ialehkai ka Langsning ka la lap ba ioh thep kynsan ar kol lyngba u Richie bad na u Apborlang.
Hadien ba la ioh ban thep ia kine ki ar kol, ha ka kylla miet, ka rukom ialehkai na ka kynhun ialehkai ka Langsning ka lam sting bha, bad ha kum kane ka rukom ialehkai ka Nongrim Hills ka la shim ia kane ka kabu ksiar bad ioh syndon ia ka lad ba kan pynphai shwa ia ka shi kol lyngba u Sanborlang Sohtun bad ia ka kol kaba ar kaba dei pat ka own goal, kaba long hadien ba u Damonlang Pathaw ha ka jingbakla u la kum head pynban ia ka bol sha la ka jong ka kol.
Ka jingioh ka Nongrim Hills ban thep ia kine ki ar kol thret kam lah ban khlem da pynkyndit bynriew ia ki rang ialehkai ka Langsning, ha kaba ki la sdang ban nion tyngeh shakhmat ka rukom ialehkai ka jong ki katno tam lei lei ia ka kut ialehkai jong ka Nongrim Hills bad ha ka por ba la pynjlan ia kane ka jingiakhun ba u Istarbor Marngar u la ioh ia ka kabu kaba biang bha ban pynkhih ir ia ka jar, kaba biang pura ia ka kynhun ialehkai ka Langsning FC ba kan khur ia ka jingjop.
Da kane ka namrem kaba hynne ka janmiet, ka Nongrim Hills ka sah satang lai tylli ki jingiakhun ba kan pyndep ha kane ka samoi ialehkai ba mynta ka SPL, ha kaba ar tylli na kine kan dei pyrshah ia ki artylli ki team ba khlain katta ka Mawlai bad ia ka Shillong Lajong FC, ha kaba dei kine ki artylli ki team ne klob kiban iakhun pat lashai ka sngi ha ka por 4:30 nohphai sngi.
