Shillong, Risaw 19 : U General Secretary ka All India Congress Committee (AICC) ba khmih ia ka Meghalaya, u Manish Chatrath, ha ka sngi Palei ula pynpaw ia ka jingsngew skhem ba ka party Congress kan khur ia ka jingjop ha ka elekshon MP- Lok Sabha 2024 na baroh artylli ki seat ka Meghalaya-ka Shillong bad Tura Parliamentary seat.
“Nga tharai ka elekshon Lok Sabha kan sa kylla mynta bad ngi sngewskhem ba baroh artylli ki seat na Meghalaya kin wan sah ka Congress” ong u Chatrath haba iakren bad ki nongthoh khubor.
Ula ong “Haba peit ia ka MPCC hapoh ka jingialam u bah Pala, ngi la thikna bad ngeit ba ngin shah jied ha u paidbah namar haba phi peit hadien ka jingwan jong kane ka Sorkar ha u bnai Rymphang-Lber, kiei kiei kila kylla lut. Kaei kaba kila kular kim shym la lah ban pynurlong”.
Haba pynpaw ba ka jingpynkhreh ia ka elekshon kala iaid shaid shaid, une u Heh ka AICC ba khmih ia ka Meghalaya ula ong “Haba phai sha ka elekshon ha Khasi Hills bad Ri-lum Garo, ngi la don ia ki nongialam bala rangbah bha bad ym dei satia ba don tang uwei hynrei bun ngut bad hakaba kut, ka dei ka Screening Commmittee ha Delhi kaba rai bad ka iaid pat sha ka Central Election Committee ban rai mano na kine ki Nongialam kiba don jingkyrmen bha ban jop”.
Halor ka lawei ka Congress, u Chatrath ula ong ba bun ki seng sain pyrthei kila iasoh lang ha ka kynhun synrop INDIA bad ka dei ka kynhun synrop kaba khlain bad kaba don ia ki Nongialam kiba radbah ha manla ki Jylla.
“Lada nga sdang na Tamil Nadu, West Bengal, Delhi, Rajasthan, Madhya Pradesh, bad Punjab – ngi don ia ki nongialam ba radbah kiba la long Myntri Rangbah ki Jylla. Phi iathuh ia nga, kiei ki party ba don ha kane ka kynhun” ula ong.
