Nongstoin, Naiwieng 18 : Ka Federation of Khasi Jaintia and Garo People (FKJGP) Rimuliang Circle, hynne ka sngi Thohdieng, kala pynpaw ia ka jingsngewnguh ia ka Sorkar Meghalaya Democratic Alliance (MDA) ba ialam da u Conrad K Sangma kum u Myntri Rangbah, halor ka rai ban pynkha ia ka Community & Rural Development (C&RD) Block ha Ri-Muliang.
“Ngi da sngewnguh bad sngewkmen ban ioh jingtip ba ka Sorkar Meghalaya kan sa plie ia ka Ri-Muliang Block bad ban sa buh ia u mawnongrim ha ka 22 tarik u Naiwieng 2022” ong ka FKJGP Rimuliang Circle lyngba u General Secretary Bah Serbilin Lyngdoh.
“Kane ka dei ka mat kaba kum ka Seng ngi ai jingiaroh bad pyrto shisha ia kane ka Sorkar ba mynta kaba iohi jngai ban wanrah ia ka Rimuliang Block” kala bynrap.
Ka FKJGP kala pynpaw “Haba ngi ioh pdiang ia ka Block, ngi dei hok ban pdiang ia ka da kaba kmen. Ka jingkynti ia ki Nongialam Shnong, ki Seng Samla Shnong, ki para Sengbhalang ka long ban gin iatylli lang kawei ban ym don kano kano ka jingwit ne ka huri hura ha kane ka sngi ba buh mawnongrim”.
Halor ka jaka ban tei ia ka Ophis ka Block, une u Nongialam ka FKJGP ula pynpaw ba ka Seng kam don kano kano ka jingujor namar kane ka kam ka shong eh ha ka jingiapynbeit jong ka Sorkar bad ki bor Synshar Shnong lem bad ki bor ka Hima hynrei ula ong pat ba ka Sorkar ka dei ban pynthikna ba ka Block kan hap hapoh ka Thain Rimuliang.
“Ka jingai Block ha ka thain kam dei ka jingiohnong ne jingmyntoi jong kano kano ka kynhun ne ka Seng sain pyrthei hynrei kan dei ka jingmyntoi ia u duk u suk jong ka dong ka thain baroh kawei” ula ong.
