Shillong, Nailar 05: Ka Iing Dorbar Thaw Ain ka jylla ka la pynpaw ia ka jingsngewsih kaba khraw halor ka jingkhlad noh jong u Lat barim ka jylla Meghalaya u Satya Pal Malik.
U Satya Pal Malik u la khlad noh na kane ka pyrthei ha ka rta kaba 79 snem, hadien ka jingpang kaba la slem bha.
U Satya Pal Malik u la bat kum u Lat ka jylla Meghalaya naduh ka 18 tarik Risaw 2020 haduh ka 3 tarik Risaw 2022.
La kha ïa u Satya Pal Malik ha ka 24 tarik Naitung 1946, u dei u riewstad ba pawnam jong ka ri India uba la shakri kum u Lat jong ka Jylla Bihar, Odisha, Jammu & Kashmir, Goa, bad Meghalaya.
La tip ia u Satya Pal Malik na ka bynta ki kam jingaiti kaba khlem artatien jong u ha ki kam paidbah ha kaba u Lat barim ka Jylla u la kren khamtam eh ha ki mat kiba iadei bad ka jingbha jingmiat jong ki nongrep, ha kaba u la ioh ia ka jingburom ha kylleng ki bynta jong ka sain pyrthei.
Ka khubor sngewlem ba la pynmih da ka Iingdorbar Thaw Ain ka Jylla ka la ong, “U nongïalam uba rit mynsiem, uba sbun bad uba don ïa ki nongrim, yn kynmaw ïa u Satya Pal Malik namar ka jinglong ba janai jong u, ka jingjylliew jong ka jingtip, bad ka jingshlur ban kren halor ki mat kiba kongsan ha ka ri. Wat hapdeng ka jinglong kaba jemnud hynrei u la don ïa ka jinglong kaba stad bad kaba buh dak ha baroh kiba la ioh ia ka kabu ban ithuh ia u.”
U Lamphang ka Ïingdorbar Thawaiñ u Thomas A Sangma bad ka Meghalaya Legislative Assembly Secretariat ki la pynpaw ïa ka jingsngewlem kaba khraw sha kane ka longïing kaba la duh noh bad duwai ruh ba U Blei un ai ka bor bad ka jingpyntngen ïa ki ha kum kane ka por jong ka jingsngewsih.
