Shillong Nailur 30: Ka HID Foundation Shillong kala pynpaw ia ka jingsngewkhia halor ka jingkynrei ki kam sniew pyrshah ia ki khynnah hapoh ka jylla Meghalaya, khamtam eh ha sor Shillong bad kala kyntu ia ki kmie ki kpa ba kin long kiba peitngor bad ban shim ia ka jingkitkhlieh ban iada ia la ki khun.
Ha ka kyrwoh khubor kaba la pyllait da u Executive Coordinator Bah Soniland Malai, ula ong, ba ka Foundation kala shim khia ia ki khubor kiba mih ha ki lad pathai khubor ba pyni ia ki jingjia jong ki kam pyniap briew bad thombor kynthup ia ki khynnah, kaba pyni ia ki jinglong jingman ki bym sngewtynnad ha kylleng ka Jylla.
“Ka HID Foundation Shillong ka kyntu jur ia ki kmie ki kpa, ki bahaiing bahasem ba kin long kiba phikir bha iala ki khun namar ba ki kam sniew pyrshah ia ki khynnah kila jia ha kylleng ki jaka jong ka jylla khamtam eh ha sor Shillong” ong ka kyrwoh.
Ka Foundation ka ban jur ba ka jingshngain bad ka lawei jongki khynnah kan shong eh ha jinghusiar bad ka jingkitkhlieh ki kmie ki kpa.
“Ka long kaba kongsan bha ban long kiba peitngor bad kiba husiar hashwa ba kan don kano kano ka jingjia” ong u Bah Malai haba bynrap ba ki bahaiing bahasem kidei ban shim ia ki sienjam kiba biang ban iada na kano kano ka jingma.
Ka Foundation kala ban jur ia ka jingkongsan ban don ka jingshimkhia lang da baroh kaba kynthup naduh ki bahaiing bahasem, ka shnong ka thaw, ki bor khmih jong ka ain, ki jaka ri bad sumar ia ki khynnah, ban wanrah ia ka jinglong jingman kaba shngain na ka bynta ka bha ka miat jongki khynnah.
