Shillong, Jylliew 24: Ki shnong ka South Garo Hills kiba la dkut na ki lad pyniasoh bad ka Jylla naduh ka jingther u lapbah ha ka 17 tarik Jylliew, kila sngew shngain mynta da ka jingioh ia ki lad jingiarap na ka sorkar khamtam ki marbam bala pynpoi da ki helipcopter ka Indian Air Force.
Ka jingpynpoi marbam jong ki helipcopter ka IAF kala iaid shaid shaid mynta ban leit sam sha kine ki shnong ba shah ktah jur jong ka South Garo Hills ha une u lapbah uba la wanrah ia ka jingshlei um bad ka jingtwa khyndew ha kylleng ki jaka.
Kine ki marbam ki dei kiba la mang ban leit sam sha ki longiing jong ka thain Maheskola, South West Khasi Hills, ka Siju haduh ha Mahadeo kiba hap ha South Garo Hills District.
Ki shipai IAF kila pynhiar haduh san sien ia ki helipcopter sha kane ka thain ryngkat ka jingkit ia ki marbam ba da ki ton, kiba kynthup naduh u khaw, u dai, ka shini, ka mluh, biskit, ka dud, ka umphniang bam bad ki jain ki nep kynthup ki blanket, ki tarpaulin bad kiwei kiwei.
Ki bor District ka South Garo Hills ki pyntip ba ki helicopter kila ioh ban hiar sha ki bynta jong ka South West Khasi Hills kaba don ha khappud ka Maheskola bad ki kynhun jong ka Sorkar, kila leit lum ia kine ki marbam ban leit sam sha ki shnong ki thaw ba kiba la dkut ka jingpyniasoh bad ka Jylla.
Kane ka jingleit pynhap marbam da ki shipai Airforce kan dei kaba heh duh ha ka histori jong ka Ri-lum Garo.
Ki bor District ki pyntip ba volunteer na ki Shnong ki thaw jong ka thain South Garo Hills kin sa leit ban lum ia kine ki marbam na khappud ka South West Khasi Hills bad kin sa leit rah sha ki shnong kiba shah ktah da kaba iaid kjat ne da ki kali saw shaka lane ki trok rit ban sam sha ki longing longsem ka thain.
