Guwahati, Jylliew 24:Hapdeng ki kynrum kynram sain hima hapoh ka sorkar Maharashtra, ha ka ba ka kynhun ialeh pyrshah jong kumba 40 ngut ki MLA ka Shiv Sena ki la don mynta hapoh five star hotel ha ka nongbah Guwahati, hynrei na ka liang u Myntri Rangbah (CM) ka Assam u Himanta Biswa Sarma u la kyntait ba um don jingtip ba kine ki MLA ki don hapoh Assam.
“Ki don shibun ki hotel ki ba paka ha Assam, kino kino ki lah ban wan bad ban sah bad kam don jingeh ei ei halor kata. Ngam tip la ki MLA na Maharashtra ki don ne em ha Assam,” ong u Sarma lyngba ka lad pathai khubor.
Nalor kata u Sarma u la ong ruh ba kim shym la don satia kino kino ki kyndon ain ki ban khanglad ia ki MLA na kiwei pat ki jylla ba kin wan shapoh Assam.
Watla u CM Sarma u la kyntait ba um don jingtip ei ei halor ka jingdon jong kine ki MLA ka Maharashtra ha ka jylla jong u, hynrei ki ba bun na ki dkhot ka kynhun myntri jong u ki la dep ban leit jngoh shapoh Radisson Blu hotel ha Guwahati, ka jaka ha ka ba kine ki MLA ka Maharashtra ki shong ki sah.
Ha ka sngi Palei ba la lah u myntri sorkar ka Asam u Ashok Singhal u la leit jngoh ia katei ka hotel ha Guwahati ha ka ba la ngeit ruh ba u la iakynduh ia ki MLA ialeh pyrshah ka Maharashtra.
Lyngba ki video napoh katei ka hotel la iohi ruh ia une u myntri ka BJP na Assam u ba dang ia shondur lang bad kitei ki MLA ka Maharashtra.
Ha kawei pat ka bynta na ka liang u Myntri Rangbah ka Maharashtra u Uddhav Thackeray ha kane ka sngi Palei ba la lah u la ujor sha u Lamphang ka iingdorbar na ka bynta ban weng noh ia ki 12 ngut ki MLA ialeh pyrshah seng na ka jinglong dkhot.
