Shillong, Naitung 01 : U Chief Electoral Officer Dr BDR Tiwari ha ka sngi Nyngkong ula iathuh ba haduh 1,19,129 tylli ki enumeration form lah dep ban sam ha kylleng ki jaka jong ka Jylla ha ka sngi nyngkong jong ka jingleit rung thliew iing ban leh ia ka Special Intensive Revision (SIR), 2026 jong ka Electoral Roll, kaba kot haduh 5.07% na ki jingdon ki nongthep vote ka Jylla.
Kane ka jingleit rung thliew iing kala sdang ha ka 30 tarik Jylliew ha kaba ki Booth Level Officers kila leit sha man ki thliew iing ban sam ia ki form bad pynshisha ia ki jingtip ba pura jong ki nongthep vote kum shibynta jong ka prokram bala pynbna da ka Election Commission of India.
“Ka jingthmu ba hakhmat eh jong ka SIR ka long ban pynthikna ba ym dei ban don ki nongthep vote kiba dei hok ban thep vote ba kin shah iehnoh, katba ki briew ki bym dei hok ki shah kynthup ha ka Electoral Roll” ong u Dr Tiwari.
U iathuh ba 3551 ngut ki BLO kila don ha kylleng ka Jylla, bad man ki BLO ki hap ban khmih ia 662 ngut ki nongthep vote. Baroh kine ki BLO ki dei kiba la dep ioh ia ki jinghikai ban leh ia kane ka kam.
Nalor kane, 60 ngut ki Electoral Registration Officer, 166 ngut ki Assistant Electoral Registration Officer bad 410 ngut ki BLO Supervisor la dep ban thung bad ai jinghikai ban khmih ia kane ka jingleh SIR.
Ka Meghalaya ka don haduh 23,49,645 ngut ki nongthep vote baroh lang.
Halor ka jingiaid ki kam ha ki District, u Dr Tiwari u iathuh ba ka South West Garo Hills kala lam khmat da 20.49% ha ka jingsam ia ki enumeration form, bud sa ka North Garo Hills ba kot 10.25%, South Garo Hills-6.67% bad West Garo Hills-6.5%.
Ka East Khasi Hills kaba don bun eh ki nongthep vote, la dep ban sam haduh 28,006 tylli ki form lane 4.43% na ki nongthep vote kat haduh ka 3 baje janmiet jong ka 1 tarik Naitung.
Kane ka jingleit pynshisha na man ki thliew iing kan iai bteng tad haduh ka 29 tarik Naitung.
Ha kane ka jingleit rung iing, ki BLO kin ai ia ki form duplicate bad lum biang ia ki tang mar syn dep pyndap. “Ym donkam ia kiwei pat ki kot ban kyrshan ia ki kyrteng ha kane ka jinglum kyrteng” ong u Dr Tiwari.
Lada jia ba lap ia ki iing ba khang tala, ki BLO kin ieh ia ki form bad kin sa wan biang haduh laisien ban lum ia ki. Ki nongthep vote ki don ruh ia ka lad ban phah ia ki form online lyngba ka ECINET mobile app lane ka Voter Services Portal at voters.eci.gov.in, ula ong.
Ban iarap ia ki nongthep vote, ka Electoral Roll jong u snem 2005 na ka SIR ba khatduh yn sat hep hapoh ka website u CEO, ka website ki bor distrct, ECINET app, bad ka Voter Services Portal. Ki BLO ruh ki lah ban khmih ia ka Electoral roll 2005.
“Ki nongthep vote kiba paw kyrteng ha ka Electoral Roll u snem 2005 la bthah ba kin pyndap ia ki jingdonkam-ka kyrteng, kyrteng ki bahaiing, kyrteng ka Jylla, District, Assembly Constituency Number, Part Number, bad Serial Number, hashuwa ba kin pyndap ia ka Enumeration Form” ong u Dr Tiwari.
Ula bynrap ba ki nongthep vote kiba wan sah ha Meghalaya hadien u 2005 ki lah ban peit ia ka SIR roll ba khatduh jong ki Jylla ba ki sah mynshuwa lyngba ka Voter Services Portal lane ECINET app ba kin ioh ia ki jingtip kiba donkam.
U Dr Tiwari ula kyntu ia ki paidbah ban iatreilang bad ong “La kyrpad ia ki Nongthep Vote ban iatreilang bad ki Booth Level Officer ha ka jingwan jong ki, pyndap bha ia ki enumeration form bad pynphai ia ki form bala dep pyndap sha ki BLO hapoh ka por bala buh” ula ong.
, 2026 jong ka Electoral Roll, kaba kot haduh 5.07% na ki jingdon ki nongthep vote ka Jylla.){kind=link}