Dawa leh eiei pyrshah ia ki dkhot ka Inquiry Committee
Shillong, Jymmang 09 : U Assistant Inspector General (AIG) ka Tnad Meghalaya Police Bah GK Iangrai ha ka sngi Palei, ula ujor da ka ejahar pyrshah ia u Director General of Police (DGP) ka Jylla Lajja Ram Bishnoi halor ka jingkynnoh ba u pyndonkam bakla bad pynkylla ia u nombor jong ka kali ba ai pyndonkam ia u.
Ia kane ka ejahar la mudui ha Shillong Sadar Police Station, kaba la jia ruh ha ka por shuwa ba u Bishnoi un shongthait noh ha ka 19 tarik Jymmang.
U Bah Iangrai uba la shah kem ha ka 2 tarik Naiwieng, 2022 halor ka jingkynnoh ba u pyndonkam bakla ia ka pisa bala mang ban tei ia ka National Emergency Response System (NERS) Building ha Shillong, ula dawa ruh ban leh eiei kat kum ka ain pyrshah ia ki dkhot ka Inquiry Committee halor kane ka kam.
Ha ka ejahar, une u AIG barim ula ong ba ka Enquiry Committee bala thung ha ka 18 tarik Naitung, 2022, ha ka kaiphod ba thoh ha ka para 1 jong ka sla 3 ka ong kumne. “Kawei ka Hyundai Verna kaba pynieng ha Central Workship ka dei kaba la ai da u nombor thok bad ym shym la register ia kane ka kali da u AIG-A, naba ym don satia ki kot ki sla”.
U ong ba kane ka kaiphod ka paw kum kaba la pynkhreh na shuki kata kum ban shu ong la leh khlem da leit tohkit ha jaka bad wad jingtip ia ki kot ki sla bad ka Tnad Transport.
Kat kum ka shithi hapoh ka Right to Information Act (RTI) ba 27 tarik Naitung 2023 halor kane ka kali kata ka Verna 1.6 VTVT ka dei kaba la register bad ka Tnad Transport ka Sorkar Meghalaya, Shillong kum ka nombor ML-02-A-0001 ha ka kyrteng jong u Director General of Police, ka Sorkar Meghalaya.
“Kane ka jingtip ai hapoh ka RTI da ka Tnad Transport ka Sorkar Meghalaya ka pyniap ia ka kaiphod jong ka Inquiry Committee, kaba dawa ba dei ban leh eiei kat kum ka ain pyrshah ia ki dkhot jong ka Committee” ong u Bah Iangrai.
Nalor kata ha ka ejahar, une u AIG barim ula ong ba kawei pat ka bynta jong kane ka kam ka dei kaba thamla bha kumba ka paw na kine ki sakhi. “U Lajja Ram Bishnoi uba bat ia ka shuki jong u Director General of Police, Meghalaya, ula wan sha Shillong ban shimti ia kane ka kam ha ka 17 tarik Jymmang 2022 da ka kali Kia Carnival Limoisine rong lieh, kaba don ia u registration ka Sorkar Assam hynrei hadien kane, la paw ba u Lajja Ram Bishnoi, lyngba ka buit kam bymman, ula pynkylla ia u nombor plate jong kane ka kali bad mynta ula buh da u nombor plate ba thymmai ML-02-A-0001, kaba dei ka nombor bala register ia ka Verna 1.6 VTVT”.
U ong ba la lap ruh ba kane ka Kia Carnival Limoisine rong rieh ka dei ka kali ba u shim wai (requisition) na ka bynta ka kam kaba tip bha tang u Lajja Ram Bishnoi hynrei ula pyndonkam ia kane ka kali na ka bynta ki kam shimet, kumba kala paw na ki dur ba u shon ha ryngkat bad kane ka kali.
Une u AIG barim ula ong ba kat kum ka Rules and Standard Guidelines, u DGP ka Jylla Meghalaya, u don hok ban ioh ia ka kali kaba shongdor hapoh ka T. 12 lak katba ane ka kali (Kia Carnival Limoisine) ka shongdor haduh T. 40 lak, kaba u DGP, ka Sorkar Meghalaya um don hok ban ioh.
“Baroh kine ki jingshisha bala pynpaw hangne ki kdew beit thik ia ka jingleh ia ki buit kam bymman bad ka jingleh thok bad shukor d au Lajja Ram Bishnoi. Nga, kumta, nga kyrpad ia phi ban register case pyrshah ia u DGP hapoh ki kyndon kiba iahap bad ban tian bishar ia u khnang ba un ioh ia ka jingpynsajia halor kine ki kam b aula leh” ong ka ejahar.
