Shillong, Jymmang 09 : Ka Single Member Committee ka Iingkashari Meghalaya High Court, bala khlieh da u Justice (Retd) BP Katakey, kala ai jingbut ban phah noh noh mar mar ia ki par dewiong bala shu iehshrah ha Meghalaya.
Ha ka interim report ba 22 bala aiti sha Iingkashari, ka Committee kala ong ba ka donkam ban pyntreikam noh ia ka project ban khangdam ia ki par dewiong bala shu iehshrah da ka Tnad Mining &Geology hadien bala shim ia ki sienjam ba kyrkieh ban pynkhreh ia ka DPR na ka bynta kane ka kam.
Kala ai jingmut ruh ban shim ia ki sienjam ba donkam da ka Tnad ba dei khmih ha kaban pynrben biang ia ki khlaw ki btap kiba la julor na ka kam tih dewiong.
Kat kum ka jingong ka Committee, ka pisa ka pahuh ha ka MEPRF kaba long haduh T.400 klur bad nalor kane ka don ruh ka pisa ba T. 100 klur bad ka Central Pollution Control Board ban pyntreikam ia ka action plan ha kaban pynim pat ia ka mariang kaba la shah pynjulor ha ki kam tih marpoh khyndew namar ki briew ba sah ha kine ki jaka ba tih marpoh khyndew ki dang bteng ban mad ia ka jingeh na ka jingmih ka um acid na ki thliew par, ki bym pat tap haduh mynta.
Ka Committee kala ai jingmut ruh ban pynjlan ia ka jingai por sa 15 sngi ia u Deputy Commissioner ka East Jaintia Hills ba un pynthikna ia ka jingdon bad jingpynkit ia 70,317.66 MT u dewiong ba dang shu dep lum jingkhein thymmai sha ka depot jong ka CIL.
Ka ong ba u Deputy Commissioner ula shim ia ki sienjam kiba dei ban shim ha kaban pyndep ia ki application bala file haki Iingkasahri ba pan jingbit ban pyniaid iew noh ia u dewiong bala kurup da kaba lilam paidbah.
