Ioh State Award u Babu Nearest New Year Lyngdoh
Nongstoiñ, Nailur 05: Ka jingrakhe ia sngi kyrpang kaba 63 jong ki nonghikai la pynlong ha Nongstoin ha kaba u Bah R.G. u Momin, MLA & Chairman jong ka Meghalaya Mineral Development Corporation, u long kum u Kongsan ha ryngkat ka jingïadonlang u Bah Edward Marngar, I/C SDSEO, Nongstoin, Fr Marius Thongni Parish Priest, Principal jong ka St Peter’s Higher Secondary School, ki nonghikai skul bad kiwei kiwei ki riew don burom.
Ïa kane ka jingïalang la pynlong ha Vanni Hall, St Peter’s Higher Secondary School kaba don ha Pyndengrei, Nongstoin.
Ha kane ka sngi la pynkup burom ruh da ka khusnam State Award ïa u Babu Nearest New Year Lyngdoh jong ka Mawlieh Govt. Upper Primary School na ka bynta ka jingshakri kaba kyrpang jong u ha ka pule puthi.
Shuh shuh I Babu Beauty Luella Nongsiej, Assistant Teacher ha Anderson Higher Secondary School, Babu Banetdella Nongphud, Head Mistress jong ka United Christian U.P School, Umsaw, bad u Babu G. Ningstar Marthong, Head Teacher ha Mawlangkhar Govt. L.P School, ka la ioh ia ka khusnam District na ka DSEO West Khasi Hills namar ka jingnoh synniang kaba khraw jong ki ha ka liang ka pule puthi.
U Babu Nestor Lyngdoh jong ka St. Xavier’s Secondary School Nongstoin u la shah pynkup burom kum u Best Scoutmaster, katba I Babu Ladeitimon Khongmalai jong ka Anderson Higher Secondary School I la shah pynklup burom kum I Best Guide Captain.
Ha kane ka prokram la pyni ruh ïa ki jingshad bapher bapher na ki skul ha kylleng ka district, kaba la pynshongkun ia ka jinglehkmen.
