Nongpoh, Nailur 5: Kumba ju rakhe man u snem ban ai burom ia ki nonghikai kiba ju len lade bad noh synñiang ban pynphriang ia ka jingnang jingnang, ka ophis u District School Education Ophisar (DSEO), Ri Bhoi District mynta ka sngi ka la shimbynta ban rakhe ia ka sngi burom ki Nonghikai kaba dei ruh ka jingrakhe kaba 63 snem, ia kaba la pynlong ha Parish Hall, Nongpoh.
Ha katei ka jingrakhe, la wan ban pynshongkun da u Bah Sosthenes Sohtun, MLA ka Jirang kum u kongsan haka jingïadonlang u Deputy Commissioner ka Ri Bhoi u Abhilash Baranwal, Ruby Das, District School Education Ophisar, Ri Bhoi District, Ki nonghikai, ki khynnah skul lem bad kiwei kiwei.
Ha kane ka sngi, la sam ruh ia ki khusnam sha u Sukanta Bhattacharjee Assistant Teacher ka St. Michael’s Higher Secondary School Umsning, haka Secondary Level, ka kong Ristrolian Nongrum Assistant Teacher ka Nehru Memorial Secondary School Umsning, haka Upper Primary Level, ka Mary Magdalin Lamo Assistant Teacher ka St. Jude LP School Umpher Byrnihat, ka Varsha Sharma kum ka Best Lady Scout Master na Little Star Secondary School Baridua bad ka Manosha Kalwing kum ka Best Guide Captain na St Paul’s Higher Secondary School Nongpoh.
U Bah Sosthenes Sohtun u la ai khublei kyrpang ïaka tnad pule puthi Jong ka District, kiba la pynlong ïa kane ka prokram ban pyndonburom ïa kane ka sngi kyrpang ki Nonghikai skul Jong ka them Ribhoi.
U la ai khublei kyrpang ruh ia baroh ki Nonghikai kiba la ai ïaka jingshakri daka ba rai kut ban pynleit jingmut bha haka kam hikai ba kumno yn nang pynwan dur ïaki khynnah skul.
La pynphuh pynphieng ruh ia kane ka jingrakhe da ka jingiashimbynta ki khynnah skul ha ka shad ka Mastih ka rwai ka siaw ka put ka tem bad kiwei kiwei.
