Shillong, Risaw 06 : U Myntri ka tnad C&RD Bah Sostheness Sohtun, ha ka sngi Nyngkong ula pynpaw ba kan shong ha ki paidbah ne baroh ki kynhun ba don bynta, ban shim ia ka rai ha ka ban pyntrei ia ka project lynti rel ha ka jylla.
“Lada dei tang ka rel kit mar ne Goods Train, ia kata lehse nga pdiang hynrei kan shong pat ha baroh ki kynhun ba don bynta lang kynthup sengbhalang bapher bapher ba kin shim rai” la ong u Bah Sostheness.
Haba jubab halor ka jingkylli, u Myntri ula ong ba um don eiei ban ong halor ka jingsngew jong kiwei haba phai sha ka lynti rel namar baroh ki don la ka jong ka jingsngew bad ka hok ban pynpaw ia kaei kaba ki sngew-kata ban pyrshah ne ban pdiang.
Ula ong, ba lada ka don ka jingmyntoi, ki kynhun bad ki seng bapher bapher ki dei ban ia shong pyrkhat lang ban ia shim ia ka rai halor kane ka kam.
“Man la uwei pa uwei u briew u don la ka jong ka jong ka jingmut bad ka jingsngew kumta ka shong beit ha ka rai jong ki paidbah bad baroh kiba don bynta lang naduh ki kynhun bad ki sengbhalang ban pynpaw ia ka jingsngew jong ki halor kane ka bynta bad ruh ngam don ei ei ban ong shuh halor kane,” pynkut u Myntri Sorkar.
