Shillong, Nohprah 20 : Ka Iingkashari Meghalaya High Court ha ka sngi Balang kala shong bishar ia ka Public Interest Litigation (PIL) bala mudui pyrshah ia ka jingbym lah ki Pulit ban leh eiei kat kum ka Motor Vehicle Act,1988 pyrshah ia ka jingniah kali arshaka khlem akor bad niah sted.
Haba shong bishar, u Nongiasaid Ain N Syngkon ula pyntip ia ka Iingkashari ba kat kum ki jingtip bala ioh lyngba ka RTI, la pyni ba kila don haduh 21 ngut ki briew ba iap bad 28 ngut ba mynsaw tang ha kine ki 12 bnai naduh 30/7/2022 haduh 23/7/2023 namar ka jingniah kali khlem akor.
Namar kata, ula kyrpad ia ka Iingkashari ba kan pynmih ia ka jingbthah ba hukum ia ka Tnad Traffic ba kin pyntreikam pyrrkhing ia ka Motor Vehicle Act bad ban buh ia ki jaka peitngor ha ki jaka ba kongsan ban rat dyngkhong ia kane ka kam.
Ka Iingkashari kala ong ba u AAG ND Chullai ia mynta la bthah ba un pan ia ki jingbthah bad ruh ban bthah ia ka Tnad Traffic ban kren halor ka jingkongsan ban bud ia ki Traffic Rules bad kiwei ki jingdonkam ha kaban tehlakam ia ka jingniah kali arshaka khlem akor khamtam haba buh hakhmat ia kane ka aiom lehkmen ka ban sa wan.
Kala bthah ban wanrah biang ia kane ka mukotduma sha ka jingbishar ha ka 7 tarik Rymphang, 2024.
