Shillong, Nohprah 20 : Ka Sorkar Jylla ha ka sngi Balang kala rai ban pynjlan ia ka por ban aiti ia ka kaiphod da ki lai tylli ki Regional Committee kaba iadei bad ki hynriew tylli ki jaka bym pat pynbeit iaki jingiakajia pud haduh ka 31 tarik u Nohprah.
Kat kum ka jingpynbna bala pynmih da u Chief Secretary Bah DP Wahlang myn ha ka 13 tarik Nohprah la ong ba kane ka dei shibynta ban buddien ia ka rai jong ka jingialang hapdeng ki Myntri Rangbah ba long ha ka 30 tarik Nailur kaba iakren halor ki kam iakajia pud ka Assam-Meghalaya.
Ha ka 24 tarik Lber, ka Sorkar Jylla kala thung ia ki lai tylli ki Regional Committee ban shong bishar ia ka jinglong jingman ba mynta jong ki hynriew tylli ki jaka bym pat iapynbeit ia ka jingiakajia pud bad ban aiti ia ki kaiphod hapoh ka 45 sngi.
Kine ki jaka ki kynthup ia ka Langpih ha West Khasi Hills District, Borduar, Nongwah-Mawtamur, Deshdommreah, Block-II ha Ri-Bhoi District lem bad ka Block-I, Psiar-Khanduli ha West Jaintia Hills District.
Ki arngut ki Symbud Myntri Rangbah ka Jylla Bah Prestone Tynsong bad Bah Sniawbhalang Dhar, kila khlieh ia ka Regional Committee ka Ri-Bhoi District bad West Jaintia Hills District katba u Myntri Sorkar Bah Paul Lyngdoh u dei u Chairman ka Regional Committee ka West Khasi Hills District.
Ha ka 7 tarik Nohprah, u Symbud Myntri Rangbah ba khmih ia ki kam pohiing Bah Prestone Tynsong uba pyntip ba ka jingialang hapdeng ki Regional Committee ka Assam bad Meghalaya kin sa sdang biang ha u snem ban wan.
