Shillong, Naiwieng 21 : U MLA ka NPP na Jowai Bah Wailadmiki Shylla ha ka sngi Balang, ula shimti kum u President ba thymmai ka National Peoples Youth Front (NPYF) bad kular ban leh eiei halor ka jingbym iohkam iohjam, ka jingjyllei u droks bad kiwei kiwei kiba ktah ia ki samla ka Jylla.
Haba kren sha ki lad pathai khubor u Bah Shylla ula ong “Nga kmen ba ka party kala ibit ia nga ban shimti kum u President ba thymmai ka State Youth Wing. Nga tip ba ka dei ka jingbahkhlieh kaba khia bha khamtam ba nga dei ruh u MLA bad kum u Chairman ka MUDA hynrei nga hap ban trei shitom namar ki don shibun ki ishu kiba ktah ia ki samla”.
“Hapoh ka jingialam u Myntri Rangbah, ka Sorkar kala leh shibun kiei kiei halor ki jingeh ki samla bad ka dei ruh ka kamram jong nga ban buddien ia baroh kine kiei kiei” ula bynrap.
Haba kren ia ki mat ba hakhmat, u Bah Shylla ula ong ba un shimkhia bha halor ka jingbym iohkam iohjam ki samla haba pyntip ba un sa iakren ruh bad u Myntri Rangbah ka Jylla halor ka kam ba iadei bad ka iohkam iohjam ki samla ha ki karkhana dewbilat kiba treikam ha East Jaintia Hills District.
Haba pyntip ba ka NPP kala aiti lut ban trei shitom ha ka elekshon MDC ban wan, u Bah Shylla ula ong ba ka dei ka kamram jong u kum u President ba thymmai ka Youth Wing ban wanrah sha ka jingtip jong ki paidbah halor ki kam kiba bha bala leh da ka Sorkar Jylla.
Kat kum ka jingong jong u, ki khubor lamler ha ki social media kila tap lup ia kiba bun ki kam bala trei da kane ka Sorkar ba mynta.
U Bah Wailad ula kyntait ruh ban pdiang ba ki paidbah kila duh jingshaniah ha ka NPP bad ong ba kane ka dei ka jingkren kaba la pynsaphriang da kito kiba don ha ka liang Pyrshah.
“Na ka 26 tylli ki seat, ngi la don 31 mynta. Balei ba ki paidbah kin nym vote ia ngi lada kam dei ba ki shaniah ia ngi” ula ong.
 bad kular ban leh eiei halor ka jingbym iohkam iohjam, ka jingjyllei u droks bad kiwei kiwei kiba ktah ia ki samla ka Jylla.){kind=link}