Shillong, Naiwieng 20 : U Nongialam ka UDP bad Myntri Sorkar Bah Kyrmen Shylla ha ka sngi Balang ula pynpaw ia ka jing sngewskhem ba ki paidbah ka Ri-lum Khasi bad Jaintia kin kyrshan ia ka UDP ha ka elekshon ban wan sha ka Iingdorbar jong ka KHADC bad JHADC, ka ban long ha u snem ban wan.
Haba iakren bad ki nongthoh khubor, u Bah Kyrmen ula ong ba ka UDP kala pynkhreh shaid shaid na ka bynta ka elekshon MDC.
“Ngi la shong jingialang na ka por sha ka por hapoh ka party. Ka party kala jam shakhmat. Ngi shu ap ia ka por ban pyn bna ia ki kyrtong ha baroh ki District. Ia mynta, ngi dang sdang ban pynkhreh ialade. Kiba bun ki kyrtong kila kyrpad ia ngi ban ai ticket” ula ong.
U Bah Kyrmen ula ong ba ha ka elekshon MDC bala dep, ki paidbah ka Ri-lum Khasi bad Jaintia kila pynjop ia bun seat ia ka UDP.
“Kumta, ha kane ka kynti ruh, ngi don ka jingkyrmen kaba khlain. Ngi la pyrshang katba ngi lah bad ngin sa pyni ruh ba ki briew jong ngi kin iadon bad ngi bad nga kyrmen skhem ruh ba kin nym pynsngewsih ia ki ha kane ka elekshon ban wan” ula ong.
Une u Nongialam ka UDP ula kubur ba ka party kala ioh ia ka jingsneng na ka elekshon MP ba dang shu dep bad ong “Ngi ngeit ba ki paidbah kila don jingkyrmen bha ia ka IDP bad khlem pep kin sa iadonlang bad ngi”.
La ka jingwan ka VPP kan ktah ia ka UDP ha ka elekshon MDC, u Bah Shylla ula ong ba ym don jingkhang satia ia kino kino ki party thymmai bad ki don ia ka hok ban iakhun ia ka elekshon.
