Mairang, Risaw 31: Kum shibynta jong ka jingrakhe ïa ka Rastriya Ekta Diwas (National Unity Day), ka ophis jong ka District Sports Officer West Khasi Hills District, Nongstoiñ, ha ryngkat ka jingïatreilang bad ka District Sports Promotion Society, West Khasi Hills District Nongstoiñ, hynne ka step sngi nyngkong ka la pynlong ïa ka jingmareh marathon kaba la tip kum ka Run For Unity, ïa kaba la sdang na ka ophis jong u Deputy Commissioner ka Eastern West Khasi Hills District, Mairang.
Ha kane ka jingmareh marathon kaba 8 kilometer, la plie da u Additional Deputy Commissioner ka Eastern West Khasi Hills District Mairang, u Bah A. Nongbri ha ka jingiadon rynkat I District Sports Officer ba dei peit ïa ka West Khasi Hills District Nongstoiñ, I Kong B. Syiem bad ruh ki nongtrei ka tnat sports, ha kaba la sakhi ïa ka jingwan ïashimbynta jong 57 ngut ki nongmareh marathon kynthei bad shynrang ka thaiñ.
Na ka liang ki shynrang, ïa ka namjop ba nyngkong, la ïoh rah da u Shainingstar Marweiñ, ïa ka namjop ba ar la ïoh rah da u Rahjopkordor Lyngdoh bad ïa ka namjop ba lai la ïoh rah da u Mebansaiñborlang Pathaw. Katba, na ka liang ki kynthei, ka Ibashongkun Kurbah ka la jop ïa ka kyrdan ba nyngkong, ka Laaihun Hoojon ka la jop ïa ka kyrdan ba ar bad ka Nerisa Nongrum ka la ïoh rah ïa ka kyrdan ba lai.
Ki nongjop ba nyngkong, ba ar bad ba lai jong kane ka jingïakob mareh marathon ki la ïoh rah ïa ka song pisa kaba lai hajar, ar hajar bad shi hajar tyngka. La sam consolation prize ruh mar san spah tyngka sha ki nongjop ba wan ba saw, ba san, ba hynriew, ba hynniew, ba phra, ba khyndai, ba shiphew bad ba khatwei.
