Nongpoh, Risaw 31: Ki Pulit ka Ri-Bhoi hynnin ka sngi, kila ioh ban bat ia kawei ka kali kaba wan na Manipur sha Shillong bad ioh ban kurup ia u drok ba shongdor haduh T. 4.8 klur eiei.
Ki Pulit ka Ri-Bhoi kiba la ioh ia ka jingtip ba bniah ia ka jingwan kane ka kali ba don u nombor ML05-S-9485, kila pynap shrip ha ka thain Ri-Bhoi bad hynnin ka janmiet por 5.20, kila ioh ban bat ia kane ka kali lem bad ia uwei u nongkhaii droks.
Ha ka jingtalasi ia ka kali, ki Pulit kila ioh ban kurup haduh 74 synduk sabon u heroin ba shongdor haduh T.4 8 klur bad kila kem ia u briew ba don ha kane ka kali uba kyrteng u Simtekhan Tluanga.
Ia une u briew la register case ha Nongpoh Police Station bad la pynngat hapoh ka kyndon NDPS Act. Ka jingtohkit mynta kala iaid shakhmat.
