Shillong, Nov 7: Ka jingiakhun hapdeng ka Shillong Lajong FC bad ka Mawlai SC kaba dang bat ia ka nam lahduh, kala kut noh ha ka jingiakhaid mar 1-1 kol hapdeng ka jingshongshit bad jingshlei ki nongpeitkai, ha ka lympung ialehkai OC Blue Shillong Premier League 2024 ha SSA Stadium, First Ground, Polo, ha ka sngi Balang.
U Damanbhalang Chyne ula thep ia ka kol ha ka 70 minit na ka bynta ka Mawlai hynrei u Yohaan Benjamin ula ioh ban pyniakhaid da kaba thep ia ka kol ha ka minit kaba 82 na ka bynta ka Lajong kata 10 minit shwa ban kut noh ka jingiakhun.
Kane kadei ka sien ka baar ban don ka jingiakhaid na ki 16 tylli ki jingialehkai ha kane ka samoi kaba mynta bad kane ka jingiakhun kala pyni ruh ia ka jingtbit bad ka jingia ryngkat bor hapdeng ka Mawlai bad ka Lajong.
Ka Lajong kala bteng ban bat ia ka kyrdan kaba nyngkong ha ka OC Blue SPL ha ka jingkamai point. Ka SLFC bad Mawlai kila ioh mar 7 point hynrei ka Lajong kala wan hakhmat namar ka jingiapher ha ka jingthep kol ne Goal Difference (+5 bad +4).
Ha kane ka jingiakhun ka Lajong kam shym la pynmih satia ia u Deibormame Tongper hynrei ka Mawlai kala pynmih hadien ia u Khrawkupar Jana hadien ba kala don ka jingiakhaid, ha kaba u Coach u Bah Hering Shangpliang ula pyrshang ban ioh khur ia ka jingjop ia kaba ym shim la lah ban pynurlong.
Ka jingiakhun ha ka kylla step kala kut ha ka jingiakhaid, hynrei ha ka minit kaba 4 u Donlad Diengdoh ka Mawlai ula ioh ia ka lad hynrei ka jingshut ka jongu ia ka bol kala leit sharud bad hadien katei u nongap kol ka Mawlai u Lambhamiki Lamare ula ioh ban iada ia ka bol kaba la pyrshang thep da u Yohaan.
Ka jingiakhun ha ka sngi Palei kan long hapdeng ka Sawmer SC pyrshah ia ka Langsning FC ha ka por 2:30 mynsngi.
