Shillong, Naiwieng 27: Ka Nangkiew Irat SC kala pynrem da 2-1 ia ka Shillong Lajong FC hynne ka sngi Balang haka lympung OC Blue Shillong Premier League 2024.
Kane ka jingshah rem jong ka Shillong Lajong kala pynlong ia ka Mawlai SC ban bat ia ka kyrdan kaba nyngkong hadien ba kala pynrem da 3-0 ia ka Nongrim Hills SC.
Katba ha kawei pat ka jingiakhun, ka Rangdajied United FC kala pynrem ia ka Laitkor SC da 3-0 bad kala kiew sha ka kyrdan kaba lai jong kane ka lympung ialehkai.
Ka Mawlai kaba la ioh 13 point mynta kala tam da 3 point ia ka Lajong kaba la ioh 10 point, katba ka RUFC kala ioh mynta 9 point.
U Rang ap kol ka Lajong u Siwel Rymbai ym shim la lah ban shimkhia ia ka bol kaba la ai da u nongialehkai shadien ha kaba u Damehun Syih ula thep ia ka kol ha kaminit kaba 12 naka bynta ka Nangkiew Irat. Hadien kane u Deibormame Tongper ula ioh ban pyniakhaid da kaba thep ia ka kol ha ka 31 minit bad haduh ba kut ka kylla step ka jingiakhun kala kut ha ka jingiakhaid da 1-1.
Ka jingiakhun kala paw kumba kan kut ha ka jingiakhiad hynrei ka Nangkiew Irat kala pynthikna ban khur ia ka jingjop lyngba ka jingioh thep kol u Jefferson Pakyntein ha ka 88 minit kaba la pynsah jingkynmaw syndon ia kane ka jingjop ia ka kynhun baroh kawei.
Hadien kane, ka Rangdajied kala pynrem ia ka Laitkor SC da 3-0 ha kaba u Owanijuh Pajuh ula thep ia ka kol ha ka 48 bad 56 minit bad ha ka minit kaba 63 u Manbhakupar Iawphniaw ula thep ia ka kol lyngba ka jingshut ia ka penalty bad kane ka jingjop kala pynlong mynta ia ka Rangdajied ban jop lai sien lynter ha ka jingialehkai.
Ka Laitkor kala ioh ia ka kabu ksiar mar syn sdang ka jingiakhun bad kala ioh thep ia ka kol hynrei ym shim la khein shuh ia katei ka kol namar ba kadei ka Offside ha kaba u Fridison Wanniang ula tam lypa ia kiwei pat nongialehkai.
Ka Laitkor kala pynkhlain bha ia ki rangialehkai shadien ha kaba ka RUFC kam shym la lah ban leh eiei ban ioh thep kol ha ka kylla step hynrei ynda la poi ka kylla miet ba ka RUFC kala ioh ban thep ia kitei ki 3 kol ban khur ia ka jingjop.
Ha ka jingiakhun hapdeng ka Nongrim Hills pyrshah ia ka Mawlai, la sakhi ba ki nongialehkai ka Nongrim Hills kila ialehkai bha hynrei kim shym la lah pat ban thep kol. Ka Mawlai kam shym la iohlad eiei ban thep kol ha ka kylla step hynrei dei ha ka kylla miet ba kala ioh ban thep ia ki kol lyngba u Kevin Rymbai ha ka 55 minit, u Dibinroy Nongspung ha ka 82 minit bad u Overkindness L Mawnai ha ka minit kaba 88.
Lashai ka sngi Palei, kan don tang kawei ka jingiakhun hapdeng ka Ryntih FC pyrshah ia ka Sawmer SC ha ka por 5:30 janmiet.
