Shillong, Risaw 18: Ka Mawlai SC kala pynliem ia ka Rangdajied United FC da 3-2 ha ka jingiakhun jong ka OC Blue Shillong Premier League 2024 kaba la long hynne ka sngi Thohdieng ha SSA Stadium, First Ground, Polo.
Kine ki artylli ki kynhun ki dei kiba kynhun ba poi sha ka phainal jong ka samoi 2023, ha kaba ka Mawlai kala ioh khur ia ka nam lahduh.
Kane kadei ka jingiakhun kaba khatduh jong ka First Round bad ka jingiakhun kaba nyngkong eh kaba la pynlong haka por mynmiet da kaba pynmeh ia ki Floodlight, hapdeng ka jingsakhi jong ki paidbah na kylleng.
U Khrawkupar Jana ula thep ia ka kol ha ka minit kaba 3 bad 13 ia ka Mawlai katba u Fairming Suting ula ioh thep ia ka kol ha ka 78 minit. U Balamlynti Khongjee ula thep ia ka kol ha ka minit kaba 4 bad u Manbha Iawphniaw ula thep ha ka minit kaba 77 naka bynta ka Rangdajied.
U Khrawkupar ula thep baroh ar tylli ki kol da kaba shut jam ia ka bol da ka kjat kadiang pyrshah ia ka club ialehkai kaba rim ka jongu bad kane ka kol kadei kaba a ioh thep kloi bha ha ka minit kaba 3 hynrei ha ka minit kaba 4 u Balamlynti ula ioh ban pyniakhiad da kaba thep ia ka kol na ka RUFC.
Ka jingiakhun kala sdang ban iakhiad hynrei u Khrawkupar ula bteng ban ialehkai bha bad ula ioh thep ia ka kol ka baar ha ka 13 minit.
Ha ka kylla miet, ka Rangdajied kala sdang ban ialehkai bha bad kala thaw ia ki kabu bad kala ioh ban pyniakhaid biang da ka jingioh thep kol u Manbhakupar. Hynrei shwa ban kut ka jingialehkai, u Fairming ula thep ia ka kol kaba la pynthikna syndon ia ka Mawlai ban khur ia ka jingjop.
Lashai ka sngi Thohdieng, ka Nongrim Hills SC kan iakhun pyrshah ia ka Sawmer SC ha ka por 5:30 janmiet.
Ka Nongrim Hills kala jop da ka ‘Walkover’ pyrshah ia ka Laitkor SC katba ka Sawmer kala jop da 3-2 ia ka Nangkiew Irat SC.
