Pynshai ka Tnad MLP | Ym treikam ka Reservation ha ka jingpynkiew kyrdan ia ki Pulit

Shillong, Risaw 18 : Ka Tnad Meghalaya Police, kala pynshai ba ym donkam satia ia ka Reservation Policy ha ka jingpynkiew kyrdan ia ki Pulit hapoh ka Tnad.

Ia kane ka pynshai da u Asst Inspector General of Police (L&O) ka Jylla Bah Vivek Syiem halor ka jingmih ki jingkynnoh ba pynkhein ka Tnad MLP ia ka State Reservation Policy ha ka jingpynkiew kyrdan ia ki Havildar jong ki Battalion sha ka kyrdan AB Assistant Sub Inspector.

Kat kum ka hukum ba pynmih da ka DGP, ki don haduh 22 tylli ki kam AB-ASI bala pynkiew kyrdan ia ki Havildar jong ki MLP Battalion (1st MLP Battation-6th MLP Battalion). Napdeng kine ki post, haduh 16 tylli la jied tang ia ki Havildar Garo, 4 tylli sha ki bar jylla, kawei sha u Rabha bad tang kawei la ai sha u Havildar Khasi.

Kane ka jingkynnoh kala mih na ki Pulit Havildar jong ki MLP Battalion (ki bym kwah pynpaw kyrteng), kiba la shah pynduh ia ka hok ban kiew kyrdan watla ki dei kiba la shakri kham slem ban ia kiba kiew kyrdan.

Ha ka jingpynshai, u Bah Vivek Syiem ula ong “Ka long kaba donkam ban tip ba ym don Reservation ha ka jingpynkiew kyrdan hapoh ka Tnad. Ka jingpynkiew kyrdan ka dei kaba la leh halor ka jingtrei slem bad ka jingtrei bha”.

“Ha kine ki arsnem bala leit, haduh 1471 ngut ki Pulit jong ki kyrdan bapher bapher kila ioh jingmynjur ban kiew kyrdan bad ia baroh kine ki jingpynkiew kyrdan la leh thik pa thik kat kum ka hukum bala pynmih da ka Ophis DGP” ula bynrap.

Kat kum ka jingong jong u, ia ka jingpynkiew kyrdan la jied ha ka lynti kaba shai, haba bud ryntih ia ki kyndon bala buh da ka Ophis DGP. “Kane ka pynthikna ba baroh ki jingpynkiew kyrdan la leh halor ka nongrim ka jingtrei slem ia ka kam, ka jingtreikam bha bad ka jingdon ki kam ba lait” ula bynrap.

Haba phai sha ka jingkyntiew kyrdan ia ka Havildar jong ki Battalion sha ki AB-ASI, u bah Vivek ula ong ba ia kane ka kam la leh thik kat kum ka circular bala pynmih da ka Ophis DGP ha ka 25/09/2012.