Shillong, Lber 14: Ki riewieid ia ka jingialehkai football ha ka jylla, ha ka sngi Saitjain kin tuid sha Polo ban sakhi ia ka jingiakhun ban ia knieh ia ka nam lahduh jongka OC Blue Shillong Premier League 2024, ha kaba ka Mawlai SC kan iakhun pyrshah ia ka Shillong Lajong FC ha ka por 5:30 janmiet ha SSA Stadium ha First Ground, Polo.
Ia kane ka lympung ialehkai Football ki shynrang kaba la pynlong da ka Shillong Sports Association, kala nang heh katba nang iaid ki snem, ha kaba 10 tylli ki Club kila iakhun haduh 89 sien ban iaknieh ban rah ia ka nam lahduh bad ka jingiakhun kaba khatduh kaba dei syndon ka jingiakhun kaba 90, kan long ha ka sngi Saitjain.
Ka Mawlai kadei ka kynhun kaba dang bat ia ka nam lahduh bad ka dang phaikhmat ban ioh rah ia ka nam lahduh 3 sien kynthih ne Hat-trick hadien ba kala rah ia ka nam lahduh ha u snem 2022 bad ha u snem 2023 ia ka SPL.
Katba ka Lajong, kadei ka kynhun kaba la jop bad rah ia ka nam lahduh haduh 4 sien ia ka SPL bad ka sien kaba khatduh ba kala iohrah ia ka nam lahduh kadei ha u snem 2019.
Ka lahduh jong ka SPL kan ioh ia ka khusnam bad ka T.6 Lak, katba ka kynhun kaba wan baar kan ioh T.3 Lak bad kane ka song tyngka kadei kaba la pynheh ar shah na kaei kaba ju ai ha ki snem kiba la dep, kaba pyni ruh ia ka jingkongsan jong ka SPL.
Kumba long mynta, ka Mawlai hapoh ka jingialam u Coach u Bah Hering Shangpliang kala ioh khur 45 point bad kala bat ia ka kyrdan kaba nyngkong katba ka Lajong hapoh ka jingialam u Coach Bah Bobby L Nongbet kala wan baar da kaba ioh khur 42 point. Kumta ka jingiakhun hapdeng kine ki artylli ki kynhun ha ka sngi Saitjain kan long kaba itynnad bha, khamtam haba ka Mawlai kam dei ban rem bad ka donkam tang ban shu iakhaid ban iohrah ia ka nam lahduh, katba ka Lajong pat ka donkam ban pynrem beit ia ka Mawlai ban iohrah ia ka nam lahduh.
Ka SLFC ha ki 4 tylli ki jingiakhun pyrshah ia ka Mawlai ha ka OC Blue SPL kam shym la lah satia ban pynrem ia ka Mawlai. Kine ki ar tylli ki kynhun kila iakynduh ruh ha ka phainal jong ka Meghalaya State League ha u bnai Rymphang, ha kaba ka Mawlai kala pynrem ia ka Lajong lyngba ka Tie Breaker.
U General Secretary ka SSA u Bah Dipshon L Nongbri haba iakren bad ki nongthoh khubor, ula ong, ba ula iawer sngewbha ia ki nongialehkai Football kiba mihkhmat ia ka ri India ban wan peitkai ia kane ka Final bad kine ki nongialehkai kila don ban pynkhreh na ka bynta ki ar tylli ki jingiakhun kiban long ha kane ka nongbah. Ula ai khublei ruh ia ka sorkar jylla, khamtam ia u Myntri Rangbah ka jylla halor ka jingbei tyngka bun ban tei ia ki jingtei ha ki kam ialehkai ha kine ki snem kiba la leit bad ka bynrap ba dang donkam shuh shuh ia ki madan ialehkai football ha ka nongbah Shillong bad ha kiwei kiwei ki jaka ban kyntiew shuh shuh ia ka jingialehkai hapdeng ki samla jong ka jylla.
Katba u dkhot jong ka Mawlai SC u Bah Teibor Dohling bad u nongialehkai ka Mawlai u Damanbhalang Chyne kila ong, “Ngi kyrmen ba ki nongkyrshan ki jong ngi kin mih ban wan ai jingkyrshan ia ngi. Lada dei ba ngi lah ban pynrem ia ka Laitkor ngi lah dei ban long ki lahduh hynrei kane kadei kaei kaei kaba lah dep. Baroh kiba don ha ka kynhun kila pynkhreh bha ialade na ka bynta kane ka jingiakhun kaban long thik kum ka final”.
Ia ka Lajong la mihkhmat da u Bah Milan Nongkhlaw bad u Nongapkol u Siwel Rymbai.
U Bah Nongkhlaw ula pyntip ba ka SLFC kala iashimbynta dang shen ha ka Bordoloi Trophy ha Assam (rem noh ha ka semifinal), kumta ki nongialehkai kim shym la ioh por bha ban pynkhreh ne ban shongthait.
“Ngi hap ban ai khublei ia ki nongialehkai kiba la pynpoi ia ngi haduh kane ka khyllipmat. Kila don ki katto katne ki jingiakhun kaba ngi lah duh ia ki point hynrei wat la katta ruh kila ialehkai bha baroh” ula ong.
U Siwel uba la ialehkai na ka Mawlai ha ka SPL 2023, ula ong ba ka long ka jingkmen kaba khraw ban iakhun pyrshah ia ka kynhun kaba bat ia ka nam lahduh ban iaknieh ban ioh rah ia ka nam lahduh.
