Shillong, Jan 31: Ka jingiakhun hapdeng ka Sawmer SC pyrshah ia ka Nangkiew Irat SC kala kut noh ha ka jingiakhaid da 1-1 hynne ka sngi ha ka jingiakhun ia ka OC Blue Shillong Premier League 2024 kaba long ha SSA Stadium, First Ground, Polo.
U Wallamsuk Nongkhlaw jong ka Nangkiew Irat ula thep ia ka kol ha ka minit kaba 6 lyngba ka penalty hynrei u Hilford Lyngkhei ula thep ia ka kol ha ka 69 minit ban pyniakhaid na ka bynta ka Sawmer.
Kane ka jingioh khur shi point jong ka Sawmer kala pynkut syndon ia ka jingmad jingrem ka jong ka kaba 5 sien lynter, hynrei kala kiew pat sha ka 4 sien ban mad ia ka jingiakhaid ha ka jingialehkai.
Kine baroh ar tylli ki kynhun kila ioh ia ki kabu ban thep kol hynrei kim shym la lah bad kila ioh thep hi thik tang mar shi kol. Ka jingbym lah ban thep kol kadei namar ka jingkhlain jong ki rangialehkai kiba shadien ryngkat bad ki nongap kol.
Ka Nangkiew Irat mynta kala ioh 16 point na ki 12 tylli ki jingiakhun bad ka don ha ka kyrdan kaba 5, katba ka Sawmer kala ioh 12 point na ki 12 tylli ki jingiakhun ka don ha ka kyrdan kaba 8.
Ka jingiakhun ha ka 3 tarik u Rymphang kan long hapdeng ka Ryntih FC pyrshah ia ka Langsning FC ha ka por 2:30 mynsngi.
