Shillong, Rymphang 04: Ka jingiakhun hapdeng ka Nongrim Hills SC bad ka Laitkor SC ha ka OC Blue Shillong Premier League 2024 kaba la long hynne ka sngi Baar ha SSA Stadium, First Ground, Polo kala kut noh ha ka jingiakhaid khlem ka jingthep kol.
Watla kine ki ar tylli ki kynhun kila ioh ia ioh bun tylli ki kabu ban thep kol ha ka kylla step bad kumjuh ruh ha ka kylla miet hynrei kim shym la lah satia ban thep kol bad kumta ka jingiakhun kala kut noh ha ka jingiakhaid.
Kane ka jingiakhiad kala pynlong ia ka Laitkor ban don biang ha ka kyrdan kaba 4 da kaba kamai 17 point da kaba ia ryngkat bad ka Langsning FC hynrei kala don pat ka jingiapher ha ka jingioh thep kol.
Katba ka Nongrim Hills kala neh hi ha ka kyrdan kaba 7 da kaba kamai 14 point.
U nongialehkai ka Nongrim Hills u Caldolan Kharmawphlang ula ioh 3 tylli ki kabu kiba biang tam hynrei ym shim la lah pat ban thep kol bad na ka liang u nongap kol ka Laitkor u Deranius Wahlang ula pyni ia ka jingtbit ka jongu ha kaba ula ioh ban rynsied ban iada ia ka bol ban rung shapoh kol kaba la shut da u Caldolan.
U Samborwell Mynsong uba la shut ia ka bol na ka bynta kaba sha kamon ban pynpoi sha la u paralok bad u Euvasius Mawthoh uba la ioh ban pyndei da ka khlieh ia ka bol tangba kam shym la rung pat shapoh kol.
Ha kane ka jingiakhun u nongapkol ka Nongrim u Ebenson Warbah, ula ialehkai bha ban iada ia ka bol ba kan ym ioh rung shapoh kol.
Ka jingiakhun ha ka sngi Blang kan long hapdeng ka Nongthymmai SC pyrshah ia ka Shillong Lajong FC ha ka por 2:30 mynsngi. Ha ka jingiakhun kaba nyngkong, ka Lajong kala pynrem da 6-1 ia ka Nongthymmai.
