Shillong , Nailur 9: Ka Jylla Meghalaya ka thmu ban pyniar ia ka rukom treikam ka jong ki Health Sub Centres sha ka 700 tylli hapoh u bnai Lber 2027, ha kaba palat 200 tylli kidei kiba la khmih lynti ban pyndep noh ha katei ka por kaba la buh.
U Myntri Rangbah ka Jylla u Conrad K. Sangma, ula lum ia ka jingialang bad ka Tnad ka Koit ka Khiah ha ka sngi Balang bad khmih bniah ia ka jinglong jingman jong ki projek jingtei jong ka koit ka khiah kiba la pyntreikam ha kylleng jong ka Jylla.
Palat ia 110 tylli ki Sub Centre kidei kiba lah pyndep ha kine ki 2 snem kiba la dep, katba ki kam jong ki 200 tylli kiwei pat kidei kiba la buh thong ban pyndep ha u bnai Lber jong u snem ban wan. Kane ka jingpyniar kadei kaba la khmih lynti ban pynbha ia ki lad ban ioh jingshakri ha ka koit ka khiah khamtam ha nongkyndong bad ki jaka kiba jynjar bad shitom ban poi.
Ka jingkyntiew kyrdan bad ka jingtei kiba dang iaid shakhmat ha ki jaka ai jingsumar ha Bajengdoba, Byrnihat, Mahendraganj, Raksamgre bad Mylliem Umthlong kidei kiba lah jan dep artad. Ka sorkar ka don ia ka jingthmu ban pynlong ia kine ki jingtei kiban treikam noh hapoh jong u bnai Kyllalyngkot 2027.
Ka 100-Bed Hospital ha Resubelpara kadei ruh kaban sa pyntreikam noh shen.
Kine ki Projek kiba iaid shakhmat ha ki jingtei bad jingkyntiew kyrdan kin nang kyntiew sa 600 jingthiah na ka jingdon kaba mynta kaba 7,000 jingthiah ha ki jaka ai jingsumar jong ka Sorkar. Ka Meghalaya kala kynshew tyngka kumba T.750 Klur ha ki jingtei ha ka koit ka khiah ha kine ki 5 snem kiba la dep lyngba ki lad bad ki tyllong bei tyngka ki bapher bapher.
Ka Sorkar kala pynpaw ba kine ki jingpyniar kila wan ha ryngkat bad ka jingdon ia ka jingkiew ha ka liang ka koit ka khiah. Katkum ka kaiphod kaba dang shen, Meghalaya Health Trends: Progress and Priorities, kala pyni ia ka jinghiar ia ka jingkhlad ki khunlung ha ka Jylla kala hiar bha haduh 40 percent ha kine ki 5 snem kiba la dep, na ka 3,064 ha 2020-21 sha ka 1,833 ha u 2025-26, katba ka jingiap ki kmie kiba punkhun kala hiar haduh 57 percent ha kitei ki snem.
Ka jingleit kha khun ha ki jaka sumar kala kiew na ka 51.4 percent ha ka NFHS-4 sha ka 65.6 percent kaba la kynjoh ia ka 79 percent ha u snem 2025-26. Ka jingai dawai tika ki khynnah rit kala kiew na ka 63.8 percent sha ka 75.3 percent katba ka jingshim ki longiing ia ka Health Insurance kala kiew na ka 34.6 percent sha ka 74.9 percent.
Ka Sorkar kala ong, ba ka jingpynleit jingmut mynta kan long ha kaban pyndep ia ki projek kiba dang iaid shakhmat bad ban pynthikna ba ia kine ki jingdon jingem kiba thymmai dei ban pyntreikam noh mardor.
