Ka Iingdorbar Thaw Ain ka dei ka jaka ban wanrah ia ki mat iakren, ym ha surok
Shillong, Naitung 26: U National Vice President ka NPP bad Symbud Myntri Ragbah ka Jylla Bah Sniawbhalang Dhar ula kyntu ia ki nongthep vote ban jied ia u Dr DRL Nonglait ha ka elekshon shiteng samoi jongka MP Lok Saha na Shillong Constituency, haba kynthoh ba ia ka jinglong nongialam kaba shisha la thew lyngba ka jinglah ban trei ia ka kam, ym da kaba pynlong jingiakhih ha surok.
Haba kren ha ka jingialap elekshon ha shnong Nongtalang, u Bah Dhar ula maham ia ki paitbah ban shah ialam bakla ha kito kiba dang shu rung thymmai ha ki kam politik, ia kaba ula ong, ba ki mih tang ha ka por elekshon hynrei kila pulom pat ha kaban trei eiei hadien jong ka elekshon.
“Sngewbha wat nym shah ialam bakla. Mynta ka seng sain pyrthei kaba thymmai kala mih, kala wan kum ka eriong, ka ong ba ka ieid ia la ki briew bad baroh ki mih ban leit vote ia katei ka seng. Sngewsih hadien ba la kut pat ka elekshon, haba ki paitbah ki leit ban pan eiei, hynrei kim shim la ioh eiei” ula ong.
Ula bynrap ba ki nongialam kidei ban trei na ka bynta ki paitbah ha ka jaka ban shu rah tang ia ki mat ha ki surok.
“Kito kiba ieid shisha ia ki paitbah kidei ki nongialam kiba trei shitom na ka bynta ki paitbah, ym kum kito kiba ieid ia ki paidbah ha ki surok, kiba rah ia ka lama jong ka seng khlem da tip ia ka tdong ne ka khlieh bad hapdeng ka por kaba lyngkot bha ki pynlong ia ki jingiakhih hangne bad hangtai” ong u Bah Dhar.
“Lada tang da kaba shu pynlong ia ki jingiakhih, phi lah ban ioh ia ki scheme, kan don jingmut aiu shuh ban don ia ka Assembly? Ngim donkam shuh ban tei ia ka Assembly, iai bteng beit ban kren ha ki surok bad ban pynlong jingiakhih. Lada u nongialam un hap ban wad ia la ki paitbah man la ka por ba u leit, kumta um pat long uba biang ban long nongialam ha ka constituency” ula ong.
U Bah Dhar ula ong ba ki nongialam kidei ban long kum ki nongri nongsumar ia ki paitbah bad ban rah ia ki mat jong ka jingeh ka constituency hapoh jong ka iingdorbar thawain ka jylla.
“Ngi don ia ka Assembly bad ia ka mat ka jong phi kadei kaba ngi hap ban rah hangne, ym ban rah ia ki mat jong ki paitbah ha ki surok. Ki nongialam kidei kito kiba duhthiah na ka bynta ka jong phi, ym kum kita ki nongialam kiba khot ia ki paitbah bad ong ia ngin ia leit sha Secretariat ne Central Library’. Kane ka long kaba bakla” ula ong.
Ula ong, ba ka Amlarem kadei kawei na ki constituency kaba bun tam kiba la nang lah stad bad ula kyntu ia ki nongthep vote ba kin ai ka jingkyrshan kaba pura ia u Dr Nonglait.
“Ka sur jong u Dr Nonglait ha Delhi kan dei ka sur jong ki paitbah ka jylla. Sngewbha kyrshan pura lem ia u Dr DRL Nonglait” ula kyntu.
U Bah Dhar ula kdew ruh ia ki kam pynroi kiba la leh da ka sorkar kaba ialam da ka seng NPP hapoh ka jingialam u Myntri Rangbah u Conrad K Sangma.
Ula ong, ba lah dep ban tei ia kato katne tylli ki skul ha katei ka thain bad ka jingtyrwa na ka bynta ban shna ia ka suor Four-Lane bad ia ka Land Port ban pynsuk ia ka khaii pateng bad ka Bangladesh kadei kaba dang iaid shakhmat.
Ula bynrap ba ka sorkar kala pyntreikam ia ka scheme na ka bynta ki nongrep ban ai Grant ia ki hapoh jong une u snem mang tyngka.
U Symbud Myntri Rangbah ula kren shuh shuh ia ka jingiaid shakhmat ha kaba iadei bad ka koit ka khiah, bording, kam ialehkai, ka pule puthi bad kiwei kiwei ki bynta bad pan ia ka jingkyrshan na ki paitbah ban pynthikna ban lah ban pyndep ia ki projek kiba dang iaid shakhmat.
