Imphal, Naitung 27: Ki pulit ka Manipur ki la ioh ban kurup haduh 29 tylli ki tiar siat, uwei u bom bad shibun ki kuli ha ka jingkhynra ha ka thain Wakha Ching ha Imphal East district ha ka sngi U Blei.
Ha kane ka jingleit khynra la lap haduh 29 tylli ki tiar siat, kiba kynthup ia phra tylli ki Self-Loading Rifle (SLR), ar tylli ki suloi INSAS, ar tylli ki suloi INSAS folding butts, ar tylli ki suloi AK Ghatak, kawei ka INSAS Light Machine Gun (LMG), 6 tylli ki suloi 303 riffle, lai tylli ki suloi double-barrel breech-loading (DBBL) bad kawei ka suloi .pump-action.La kurup ruh katto katne ki magazine na ka bynta ki tiar ialeh ba la ioh kurup.
Ki bor pahara ki la ioh ban kurup ruh ia uwei u bom lathode, 530 tylli ki kuli .303, 64 tylli ki kuli 7.62 mm SLR, 19 tylli ki kuli INSAS, 6 tylli ki kuli 5.56 mm carbine, 40 tylli ki drill cartridge bad 17 tylli ki charger na ka bynta ki suloi 303.
Haba bud ryntih katkum ka jingtip na ki tnad syntiat ha kaba ïadei bad ka jingïaid jong ki nongleh kam sniew kiba don tiar, ki pulit ki la sdang ïa ka jingkhynra bad ki la lap ïa ka jaka buh tiar bad ki kuli kiba heh.
Ha ka jingkhynra kaba jur ha ki jaka khlaw jong u lum Wakha, markhap bad ka Shelloi Langmai Composite Farm, ki bor pahara ki la lap ia saw tylli ki pla plastic kiba suba jur kiba la buhrieh hapoh khlaw.
