Shillong, Naitung 26 : Ka Meghalaya kala jan pyndep artad ia ka bynta ba nyngkong jong ka Special Intensive Revision (SIR) 2026, da ka jingkot haduh 99.14% ha ka jingsam ia ki Enumeration Form bad 88.45% na ki, la pynrung ha ki kor digital kat haduh ka 26 tarik Naitung.
Kat kum ka kaiphod SIR bala pynlait da u Chief Electoral Officer (CEO), ka jingdon ki nongthep vote ia mynta ha Jylla ka kot 23.49.645.
Katba ka jingsam ia ki Enumeration Form kala jan dep artad, ki Ophisar kila pyntip ba 2,07,300 ngut ki nongthep vote lane 8.82%, ki dang sah ban ioh jingkhein bad kan donkam ban hap leh eiei ia ki hashuwa ban pynmih ia ka draft roll.
Kane ka jingleit pynshisha kala dep ithuh ruh ia 1,05,280 tylli ki case hapoh ka ASDD category-ki bym don ha Iing, kiba la kynriah jaka sah, kiba iap bad ki duplicate.
Kiba iap ki dei kiba bun eh na kine kaba kot haduh 59,917, bud sa ki 27,048 ngut ki nongthep vote kiba la buh dak kum kiba la kynriah jaka sah, 13,241 kum kiba jah ne bym don ha iing, 4,196 kum ki duplicate bad 878 kiba kyntait ban aiti ia ki form.
Haba nujor kat kum ki district ha ka jingsam ia ki form, ka West Jaintia Hills, East Garo Hills, West Garo Hills, South Garo Hills bad South West Khasi Hills kila kynjoh ia ka 100%.
Halor ka jingpynrung kor digital, ka Eastern West Khasi kala tam da 97.23%, bud ka West Khasi Hills ba kot 97.65% bad ka South West Garo Hills da 95.04%.
Ka Ri-Bhoi kala paw kum ka jingdon bun eh ki nongthep vote bym pat ioh jingkhein kaba kot haduh 23.23% katba ka South West Khasi Hills bad East Khasi Hills kila kynjoh ia ka 13.72% bad 10.84%.
Ka East Khasi Hills, kaba don bun eh ki nongshongshnong napdeng ki district kaba don haduh 6.32 lak ngut ki nongthep vote, ka dei kaba don bun eh na ki ASDD case kaba kot ia ka 30,910, kynthup ia 18,800 ngut kiba la iap.
Namar ba ka jingpynmih ia ka draft electoral roll kan long ha ka 5 tarik Nailar, 2026, u CEO ula kyntu ia baroh ki nongthep vote ba kin aiti ia ki Enumeration Form bala dep pyndep hapoh ka por bala buh khnang ba kin shah kynthup ha ka Electoral Roll.
 2026, da ka jingkot haduh 99.14% ha ka jingsam ia ki Enumeration Form bad 88.45% na ki, la pynrung ha ki kor digital kat haduh ka 26 tarik Naitung.){kind=link}