Shillong, Nailar 5: Ka Skulbah North-Eastern Hill University kala ai jingbit ia ki arngut ki nonghikai ki jongka ban iakhun ia ka elekshon shiteng samoi jong ka MP Lok Sabha na Shillong Constituency.
Kane ka jingai jingbit kadei kaba la mynjur ha ka jingialang jong ka Emergent Meeting kaba 88 jongka NEHU Executive Council kaba la long ha ka sngi Baar, kaba la lum da u In-charge Vice-Chancellor u Prof Saroj Kanta Barik.
Ka Council kala ai ia ka No Objection Certificates ia u Dr. DRL Nonglait na ka Department of Khasi bad ia u Prof. Batskhem Myrboh na ka Department of Political Science.
U Dr. Nonglait un iakhun na ka seng NPP, katba u Prof. Myrboh udei u kyrtong jong ka VPP.
“Ngi lah dep ban iatai sani bad ka Executive Council kala ai jingmynjur (ia ka jingtyrwa ban ai ia ka No Objection Certificate ia ki arngut ki Professor),” la ong u Prof. Barik hadien ba la wai ka jingialang.
Ha kaba iadei bad ka rukom treikam yn hap ban bud ryntih ia ki kyndon lada jop ia ka elekshon bad kine ki long kiba la shai kdar.
“Ki ain bad ki kanun ki long kiba shai kdar. Lada ki jop, kin hap ban shim shuti na ka skulbah bad katkum ki kyndon kan sa wan biang sha ka EC, kaba don ia ka bor ban ai jingmynjur bad ban shim ia ka rai” ula ong.
Ha kaba iadei bad ka jingsngew shimet, u VC ula ong ba ym shim la don satia ia kano kano ka jingiadei kaba iajan bha bad kine ki kyrtong hynrei ula kitbok kitrwiang pat ia ki.
“Nga kitbok kitrwiang ia ki. Ngin dap da ka jingsngewsarong lada uwei na ki para ba iatreilang yn ioh rung sha ka iingdorbar thawaiñ” la ong u Prof. Barik.
“Nga dei na ka Science bad nga dei u nonghikai bad u nongwad bniah, kumta ngam shim la iohlad bha ban iakren bad ki” ula ong bad ka bynrap ba ula iakynduh shisien ia u Dr Nonglait ha ka jingialang jong ka Academic Council ha kaba iadei bad ki College Affiliation ne jingpyniasoh jong ki College.
U Prof Myrboh kham hashwa ula leit mudui sha ka Meghalaya High Court ban phah tuklar halor ka jingpynslem ban aiti ia ka NOC.
Mynta namar ba lah dep ban pynkhreh ia ki Certificate, kumta baroh arngut ki kyrtong ki lah ban leit ialap elekshon noh.
Ka elekshon shiteng samoi jong ka Shillong Seat kadei kaba la hap ban pynlong biang namar ka jingkhlad noh jong u MP bad u Professor ka NEHU u Dr Ricky AJ Syngkon ha ka 19 tarik u Rymphang 2026.
Ha kane ka Constituency kan kynthup ia ki 36 Assembly Seat kiba don ha kylleng jong ka rilum Khasi bad Jaintia.
Baroh arngut u Dr Nonglait bad Prof Myrboh kila leit ban ialap elekshon ha kylleng ki constituency kum shi bynta jong ka jingpynkhreh ban iakhun ia ka elekshon MP.
