Shillong, Naiwieng 25 : U Myntri ka Tnad PHE Marcuise N Marak ula pyntip ba shen un sa shnong bishar kam halor ka jingiaid ki project bapher bapher ba pyntrei da ka Tnad.
Haba iakren bad ki nongthoh khubor, u Marak ula ong ba un shong bishar kam ia ki project ba pyntrei ha ki lai tylli ki Division, ka ban long la 28 tarik Naiwieng.
“Ha ka 28 tarik Naiwieng, ngan sa leit sha Mawkyrwat ban shong bishar kam ia ka jingiaid ki project ha ki lai Division- ka Mairang, Nongstoin bad Mawkyrwat. Ngan leit ruh ban jngoh dalade ia ki project” ula pyntip.
“Ngan shong bishar kam ruh halor ka jingpyntreikam ia ka JJM bad kiwei kiwei ki project” ong u Myntri.
U Marak ula ong ba kat kum ki kaiphod, baroh ki kam kila iaid beit kat kum ki kyndon bala buh.
“Ki kam kila iaid bha hynrei nga kwah ban iohi hi dalade da kaba leit jngoh sha ki jaka ba pyntrei ia kine ki project. Nga kwah ban iohi haduh katno ki kam kiba iaid” ula bynrap.
Haba kylli, u Myntri ula pyntip ba ka Tnad kala tyrwa ruh ba don noh ia ka Operation and Maintenance Rules.
Halor ka jingiaid ka kam jong ka Greater Shillong Water Supply Scheme (GSWSS-III), u Myntri ula ong “Mynta ki kam baroh kila iaid ha ka lynti kaba dei. Ki kam kiba la sahteng baroh shikatta, kila sdang ban iaid. Nga hap ban shong bishar kam dalade ia kane ka project ruh. Tad hadien kane ka jingialang, ngan sa lah ban batai ia fi ia ka jingiaid ka kam”.
U iathuh ba ka thong ba thymmai ban pyndei ia kane ka project ka long ha u bnai Lber, 2025.
