Nongpoh, Naiwieng 25 : Ka Dorbar Shnong Belahari, Ri-Bhoi kaba hap hapoh ka Raid Nongkhlaw, ka la rai ban tait shnong ia kawei ka Longkmie halor ka jngkynnoh ba ka donkti ban kam jubor bad register tuh ia kawei ka khlaw shnong hapoh ka Ophis u Deputy Commissioner ka District.
Kane ka Longkmie kaba shah tait shnong ka dei kaba la tip kyrteng ka kong Morias Rani bad la kynnoh ba kane ka Longkmie kala iadon bynta ha ryngkat bad 5 ngut kiwei pat ki briew.
Haba kren bad ki nongthoh khubor, u Rangbah Shnong Bah Peter Stone Syngkli bad u Secretary Shnong bah Khrawpyrkhat Rani, ki pyntip ba ia kane ka rai la shim hadien ka jingshong pyrkhat kam kaba sani bha, kaba la jia ruh hadien ka jingkyntait jong ka kong Morias ban wan mih sha ka Dorbar Shnong wat hadien bala phah jingthoh.
Kine ki Nongialam Shnong kila kynnoh ba kane ka Longkmie ym tang ba kala register tuh ia ka khlaw shnong hynrei ka ju pyndik ruh ia ki paidbah kiba leit pom dieng na katei ka khlaw.
Nalor kane, kila kynnoh ba kane ka Longkmie kala ujor ejehar ruh ia ki nongshongshnong sha ki bor Pulit ka Assam bad ka Tnad Forest ha aki thmu ban pynbha ia ka surok da kaba kam nongkynti ia katei ka khlaw kaba dei hok jong ka Dorbar Shnong. La kynnoh ba kane ka longkmie kala kam trai ia kane ka khlaw naduh u snem 2011.
Kine ki Nongialam Shnong kila kam ba kiwei kiwei kiba iadonkti lang bad kane ka longkmie kila wan ban iakren pynbeit bad pynksan ia ka jinglong trai jong ka Dorbar Shnong ia katei ka khlaw lait noh ka kong Morias Rani.
Ka Dorbar Shnong kala rai ban beh noh ia kane ka Longkmie na ka Shnong bad kala ai por 5 sngi ia kane ka Longkmie ba kan mih napoh ka Shnong.
