Shillong, Jymmang 07: U Symbud Myntri Rangbah ka jylla u Bah Prestone Tynsong hynne ka sngi Baar, ula pyntip ba ka kompani kaba pyntrei iaka Package-1 jong ka surok Shillong-Dawki lyngba ka JICA Project, kan sa pyntrei noh shen ia ar tylli ki Flyover ha nongbah Shillong.
“Kitei ki Flyover ki sdang na ka Jingkieng Umshyrpi ha kaba kawei ka Flyover kan kut ha Mahavira Park katba kawei pat kan kut hajan ka ophis treikam jong ka Meghalaya Human Rights Commission (MHRC) ka ban iaid lyngba ka Petrol Pump kaba don ha Anjalee” ong u Bah Prestone Tynsong.
U Bah Prestone uba khmih ia ka tnad PWD Roads, ula ong ba lada ka sorkar kam ioh ia ka jaka jong ka Petrol Pump kaba don ha Anjalee, kan long kaba eh shibun ban ioh shna ia ka Flyover kaban poi haduh hajan ka ophis treikam jong ka MHRC.
Ula iathuh ba ka sorkar kala ai 10,000 ne 11000 sq ft ka jaka ia u trai jong ka Petrol Pump ha Anjalee ba un tei iaka petrol pump kaba thymmai ha ka jaka jong ka sorkar kaba don ha Upper Shillong.
U Bah Prestone ula iathuh ba u kontraktor uba la ioh pyntrei iaka Package-1 jong ka surok Shillong- Dawki Road ula pyniaid shakhmat ia ki kam ki jam ha ka jingshna ia ka surok bad ula pynkhreh ruh ban shna ia ka Flyover ha ka nongbah Shillong.
