Shillong, Jylliew 27: U Myntri Rangbah ka Jylla shen un sa lum ia ka jingialang jong ka Meghalaya Democratic Alliance (MDA) ban shim ia ka rai ba iamynjur lang halor ka elekshon ban jied ia u/ka President ba thymmai jong ka Ri, ka ban long ha ka 18 tarik Naitung.
“Ha ka por kaba biang eh, ngan sa khot ia ka jingialang jong ka MDA ban iakren ia kane ka kam” ong u Conrad haba iakren bad ki nongthoh khubor hynne ka sngi nyngkong.
U Conrad ula pyntip ba ula dep iakren la jan baroh ki paralok ba iatreilang ha ka MDA hashuwa ba un leit sha Delhi ban buh ia ka kyrteng jong u kum wei na ki nongtyrwa ia ka kyrtong kumba la kyrpad da ki Nongialam ka NDA bad ka BJP.
“Nga la dep iakren la jan baroh ki paralok bad nga la kyrpad ia ki bad iathuh ruh ba nga kum u President ka NPP, ngan soi ia ka jingtyrwa kyrteng ia ka kyrtong. Nga kyrmen ba ka jingkyrshan jong ki party jong phi ruh kan don bad ha ka por ka ba dei ngan sa khot ia ka jingialang (MDA)” ula ong.
U Conrad u pyntip ba ula dep batai ia baroh ki Nongialam ka NPP halor ka jingleit jong u sha Delhi bad ka rai ban kyrshan ia ka kyrtong ka NDA ka ban iakhun ia ka elekshon President.
