Tura, Jylliew 27 : Shi kynhun ki SF-10 commando ki la hap ban pahara ha Tura Sepoy Colony kaba don markhap bad ka Akonggre hadien ba ki runar ki la wan da ka kali ban pynthut ia ka jingialang jong ka Development Committee bad thombor ruh wat ia ki arngut shipara kiba dei ki nongshong shnong jong ka Colony hi.
Kaba pynsuba halor katei ka jingjia ka dei ia u President jong ka Sepoy Colony Development Committee u Mitison Sangma bad ka kurim jong u ka Terak M Sangma kiba la byrngem ia uwei na ki ba shah thombor namar ka jing ujor da ka Ejahar ha ki pulit ka Tura hadien ba u la shah shoh ha jaka paidbah ha ka kurim u president.
U Mitison Sangma u dei u para jong u MLA barim ka Raksamgre u Lemison Sangma bad ruh jong u MLA ba mynta ka Tikrikilla u Jimmy D Sangma.
Kat kum ka jingiathuh da ki pulit la ong ba u Abhijit Dutta jong ka Sepoy Colony u la ujor da ka Ejahar sha ki pulit ha ka 22tarik mynta u bnai ha kaba u kynnoh ba u la shah thombor katba u dang maramot ia ki pipe um ha rud surok.
La ong ruh ba ha ka por ba dang maramot ia kitei ki pipe ka la mih pynban ka jingia nia kaba jur bha hapdeng jong u bad u president ka Sepoy colony ryngkat ka kurim jong u.
Ha katei ka Ejahar u la ujor ruh ba ka kurim u Mitison ka la ktah kti ia u bad byrngem ruh hakhmat ki paidbah. U kynnoh ruh ba kitei ki shi kurim ki la byrngem ba un ym lah shuh ban sah ha katei ka dong.
Halor kane ka jingjia ki pulit ki la rejistar case bad ki pulit ka Tura ki la pynlong ka jingtohkit.
Shuh shuh la ong ruh ba hadien ba la dep ujor Ejahar la kynnoh u Mitison bad ka Kurim ka Terak kila nang iai byrngem ia kine ki shipara.
Na ka liang ka Terak ruh ka la ujor kylla pyrshah ia u Abhijit Dutta ha kane ka sngi Saitjaiñ hynrei kala kubur pat ba ka la ktah kti da kaba thap ia u ha ka por ba ka jingiania ka la khluit bha hapdeng jong ki.
La nang pynheh shuh shuh ia kane ka jingjia da ka jingdon ki briew kiba thmu ban nang pynkylla ishu pher Jaidbynriew da kaba pynsaphriang ha ki Facebook pyrshah ia kitei ki ba ngat.
Ka jingnang heh ka ishu kadei hadien ba ki shi kynhun ki runar kiba la poi ha ka Scorpio Ïong sha katei ka colony ha ka janmiet sngi u Blei bad pynthut ruh ia ka jingialang jong ka Development Committee kaba dang iaid ha ka por 4.30 baje janmiet. Kitei ki runar ki la thombor beit beit ia u Abhijit Dutta bad u para jong u haduh ba ki la mynsaw.
Na ka liang ki pulit ka Tura mardor ki la her sha katei ka jaka bad pynkit noh ia kitei kiba mynsaw sha hospital katba ka jingtohkit ka dang iaid shakhmat ban ioh kem ia ki runar.
“Ngi la phah pahara da ki SF -10 ha Sepoy Colony ia mynta shipor. Kan sa don ruh ka jingialang pyniasuk lashai ka sngi katba ka jingtohkit ka.dang iaid,” ong u SP ka West Garo Hills, u VS Rathore.
