Shillong, Nailur 21: U Myntri ka tnat Labour Bah Methodius Dkhar u la ong ba ki kyndon ba la pynkylla ban pyrkhing ia ka jingwan rung bad thungkam iaki nongbylla bar Jylla ki la treikam mynta, ha kaba ki contractor ki bym pynrung kyrteng ia ki nongbylla kin shah dain kuna bad shah set phatok.
Ka Sorkar ka la pyllait paidbah ia ka website bad ka MIRSS workers portal ban pynrung kyrteng iaki nongbylla bar Jylla haka 9 tatik mynta u bnai.
“Ka portal mynta ka la treikam bad la bsuh ruh iaki kyndon ba la pynkylla. Ka ain ka la treikam mynta. Ka rukom treikam kan kham suk hynrei ki kyndon kin kham pyrkhing ban buddien ia ki nong bylla bar Jylla bad ban pynthikna ba ki contractor bud kin ia ki kyndon haba ki aikam iaki nongbylla” la ong u Bah Methodius.
U Bah Methodius ula ong ba ki nongpynkhein kin ngat ha ka jingpynshitom kaba tyngeh.
“Ka jingpynkhien iaki kyndon kaba nyngkong kan khring ia ka jingpynshitom kaba T.10,000, ha kaba ar T.25,000 bad kaba lai T.1 lak ryngkat bad ka jingshah set phatok lai bnai,” u la ong.
U Myntri u la ong ba ka jingkitkhlieh kan dei beit ki Contractor.
“Ka kuna kan dei beit iaki kontraktor, ym iaki nongbylla. Lada ki nongbylla ki wan hi, don kiba hap ban ai kam, ym lah ban khot ia u kum u nongbylla lada um aikam ia u
Ngim ju leit jurip ha rud surok, ngi leit jurip iaki jaka trei. Lada lap ia ki nongtrei ba khlem pat Rejister ha kano kano ka jaka, yn pynshitom ia u contractor” ula ong
