SHILLONG, SEPT 21: “Ia ka Meghalaya, ka Um kam dei tang ka jingdon jingem, hynrei kadei kaba don ka jingiadei bad ka mariang, ka rep ka riang, ka kamai kajih bad ka bha ka miat jong ka imlang sahlang” la ong u Myntri ka tnad Soil and Water Conservation u Marcuise N. Marak hynne ka sngi Nyngkong.
U Marak ula kren ia katei ha ka Workshop kaba ar sngi jongka PMKSY-WDC 2.0 halor ka mat “Experience Sharing, Learning and Way Forward” kaba la pynlong ha State Convention Centre, Shillong.
Ula ong, ka bor kaba btin lynti ia ka ioh ka kot bad ia ka sawdong sawkun jong ka mariang hapoh jongka PMKSY-WDC 2.0 ka long kaba iahap bha bad ka jylla Meghalaya bad ka Sorkar hapoh ka jingialam u Myntri Rangbah u Conrad K. Sangma kala pyniasoh lang ia ki kam kiba iadei bad ka ioh ka kot ryngkat bad ka jingpynneh pynsah ia ka mariang bad ka jingiashimbynta lang jong ka imlang sahlang.
“Ka thong jong ka Watershed Development kam dei eh tang ban shu thaw ia ki jingdon jingem hynrei ban pynthikna ba ka jingpynneh pynsah ia ka um kan kylla long ka lad kaba biang ha ka jingkamai jakpoh, ban kyntiew ia ka jingpynmih ha ka rep ka riang, ban thaw ia ki lad ki lynti na ka bynta ki longiing ki bym don ia ki jaka ki puta, ban pynkhlain ia ki SHG bad FPO bad ban pynthikna ia ki jingmyntoi ba kin poi sha ki shnong ki thaw kiba shaniah ha kitei ki jingdon jingem” la ong u Marak.
U Myntri ula ong, ba ki Technology kila pynkhlain ia ka rukom iaid jong ka jylla. Ka Meghalaya ka lah dep ban ithuh palat 70,000 tylli ki tyllong um, lah dep map ia palat 65,000 ki umpohliew bad buh hakhmat ia ki 792 ki jaka mih um kiba don hapdeng ka jingma kiba donkam ban pynkhie im biang, ula ong.
U Marak ula pynpaw ruh ba ka Meghalaya kadei kaba lah ioh jingithuh kum ka jylla kaba la pyntreikam bha ia ka PMKSY-WDC 2.0 ha kaba kala ioh ia ka Score kaba 73.47 percent na ka bynta u 2026-27 na ka Sorkar India.
Kane ka jingialang kaba la pynlong da ka Tnad Soil and Water Conservation bad Meghalaya State Watershed and Wasteland Development Agency (MSWWDA), kala sakhi ia ka jingsdang ia ka jingpynkylla thymmai ia ka website jongka tnad bad ia ka Project Management Information System (PMIS) hapoh jongka Climate Adaptive Community Based Water Harvesting Project (CACbWHP).
Ka PMIS ka lum thup ia ki jingtip ha kaba iadei bad ki projek, ka jingpyniasoh bad ki jylla bad ki District Unit bad ka khmih ia ki 533 tylli ki jingtei jong ka Water Harvesting ha kylleng ki 12 BMP Block, kaba plie lad ban buddien ha ka por kaba dei bad ka jingshim ia ki rai katkum ka jingdon ia ki sakhi bad ki sabut.
Ka kaiphod kaba man la ka snem jong ka Tnad bad ka jinglum thup ia ki khana seisoh jong ka Watershed kadei ruh kaba la pyllait paitbah. Ki nongjop ha ka Watershed Janbhagidari Cup 2026 (Phase II) bad Social Media Competition hapoh ka PMKSY-WDC 2.0 kila shah pynkup burom.
Haba kren maitphang u Director ka Soil and Water Conservation Department bad Deputy CEO, MSWWDA u Bah L. Shabong ula ong ba ka jingpyntreikam ia ka PMKSY-WDC 2.0 kala lah ban urlong lyngba ka jingiatreilang.
“Kane ka workshop kala lum lang ia baroh, bun ki kti bad ki jabieng kila noh synniang sha ka Watershed Development ha ka jylla ha kine ki 5 snem kiba la dep bad ka tyrwa ia ki kabu kiba kordor ban pyni, pule bad pynwandur na ka bynta ka lawei” la ong u Bah Shabong.
Ula ong, ba ka Meghalaya ka don 2,776 tylli ki micro-watersheds kiba don ha ki kyrdan ki bapher bapher. Ka PMKSY-WDC 2.0, kaba la sdang ha u snem 2021-22 kala khmih ia ki 32 tylli ki projek ha kylleng ki jaka kiba don 62,000 hektar bad 96 tylli ki micro-watersheds ha ka jingbei tyngka kaba kot T.175 Klur ha kylleng ki bynta jong ka district baroh.
“Palat 20,000 hektar jong ka jaka kaba don ia ka jingioh slap kadei kaba la wanrah hapoh ki sienjam jongka Soil and Moisture Conservation bad palat 2,400 tylli ki jingtei kiba iadei bad ka jingpynlang ia ka um, ka jingsboh jong ka khyndew bad ka lah ban ioh ia ka um, ka jingpynneh pynsah kan shong eh ha ka jinglongtrai jong ki shnong ki thaw” la ong u Bah Shabong.
Kane ka jingialang hynne ka sngi, kala kut da ka jingai jingbatai bad jingpyni kaba bniah na ka khynhun jongka SLNA, NESAC bad NEDFi halor ka Technical Planning, Spatial Application bad ka jingkyrshan ki jaka pule bad ki jingiatai halor ka jinghikai na ka WDC 1.0 bad WDC 2.0 haba pynkhreh ia ka WDC 3.0.
Kane ka Workshop kan bteng haduh ka 22 tarik u Nailur, ha kaba yn don ia ki Technical Session halor ka jinglap bad jingshem na ka rilum Khasi-Jaintia bad Garo Hills bad ki jingai jingbatai na ka ICAR, NEHU Tura bad SIRD bad kiwei kiwei.
