Shillong, Nailur 21 : Ka Kynhun Anti-Narcotics Task Force (ANTF) kala ioh kurup haduh 40.12 gram u heroin ba shongdor T.7 lak bad kem ia arngut ki briew na Pynthorumkhrah, Shillong.
U Superintendent of Police ka ANTF Vikash Kumar ha ka sngi Nyngkong ula iathuh ba kane ka jingkurup kala wan jia da ka jingioh ia ka khubor ba thikna ba ki don ki nongwan pynpoi ia u heroin na Silchar sha Shillong.
“Halor ki jingtip, ka ANTF kala buh ia ki Pulit ha kylleng ki jaka. Ha ka jingtalasi kali, kila ioh ban bat ia kawei ka kali kaba don u nombor ML05-AD-1301 ha Pynthorumkhrah” ong u Kumar ha ka kyrwoh.
U iathuh ba ka kynhun ANTF kala ioh kem ia arngut ki briew kiba don hapoh kali ba kyrteng u Jamir Hussain Laskar ba na Pangram, Cachar, Assam bad u Joy Ryntathiang ba na Umkdait, Nongmensong, Shillong.
“Ha ka jingtalasi kaba la leh kat kum ki kyndon ka ain, ka kynhun kala ioh kurup ia 4 tylli ki synduk sabon kiba thep ia u droks. Haba test, la pynthikna ba une u droks u dei u heroin bad u khia haduh 40.12 gram, uba shongdor haduh T.7 lak” ong u SP.
Ia une u droks la kurup noh bad ia ki briew la rah ban tohkit. Ia kine ki briew la register case hapoh ki kyndon ka NDPS Act, 1985.
