Shillong, Nailur 21 : Ka MLP FT ka la pynliem da 5-0 ia ka Mylliem SC, ha ka lympung Shillong Premier League 2026, ba long ha ka janmiet sngi nyngkong ha SSA Stadium.
Ha lyndet kane ka nam jop ia ka MLP FT ka la wan hadien ba u Balmingstar Lyngkhoi (4’, 31’, 68’) u la lah ba un lam khmat ia ka kynhhun ban thep haduh lai tylli ki kol, bad ia ki kol kiba sah la thep da u Everestarly Rynjah (61’), katba sa shi kol ka dei ka own goal na u Fedrick Wahlang (77’).
Kane ka lai point ka MLP FT, kala pynlong ia ka kynhun ban kiew na ka kyrdan kaba 8 sha ka kyrdan kaba 3 ha ka miej iakhein point, kaba ia ryngkat bad ka Langsning FC tangba ka jingiapher hapdeng kine ar ka long ha ka head to head.
Lada phai pat sha ka kynhun ialehkai ka Mylliem, tden kan iai sahkut shatrai duh ha ka miej iakhein point da ka jinglah ban ioh khur tang 1 point.
Ha kane ka kynti iakhun, ithuh shai kdar ba ka MLP FT ka la iakhun katba lah ba kan wanphai beit da ka jingjop na ka madan iakhun, kaba na ka por sha ka por, ka la nion tyngeh ia ka kut ialehkai ka Mylliem SC, kaba la tynjuh borbah bha ia ki rang ialehkai ki jong ka, katno tam lei lei haba ki rang ialehkai ka MLP FT ki la pyndonkam ia ka la ka bor met.
Lashai pat ka sngi ka jingiakhun kan long hapdeng ka Langsning FC pyrshah ia ka Nangkiew Irat SC kaban long ha ka por 3 baje nohphai sngi.
