Shillong, Nailur 21 : Uwei u briew ula shah ring dur ha ka kor CCTV katba u dang tuh umphniang diesel da kaba tan beit beit na ka trok tanker ba pynieng ha ka petrol pump ha 3rd Mile Upper Shillong ha ka step 17 tarik Nailur.
Kat kum ka video CCTV, une u briew uba leh marwei ia kane ka kam, ula wan rung ha kane ka petrol pump da kawei ka Maruti Alto 800 kaba don u nombor ML10-D-4951. Kane kala jia ha ka por 3 baje mynstep.
Ka video ka pyni ia une u briew uba leit jngoh shuwa ia kane ka tanky jong kane ka trok tanker hashuwa ba un rung hala ka jong ka kali bad iaid swait ia ka jaka. Hadien ula wan phai sha kane ka tanker, sei ia u pipe bad ki klong umphniang bad tan ia ka diesel na ka tanky jong ka trok.
Hadien bala pyndap ia baroh ki klong, une u briew ula phet na kane ka petrol pump hala ka jong ka kali.
