Shillong, Iaiong 14: U Symbud Myntri Rangbah ba tnad Urban Affairs Bah Sniawbhalang Dhar ha ka sngi Nyngkong, ula pyntip ba ka Sorkar kan sa mang pisa shen ban siang thymmai noh ia ki surok ha sor Shillong.
Kat kum ka jingong jong u, Ka tnad Public Works Department (PWD) kala dep aiti ia ka Detailed Project Report hadien ba ka Sorkar Jylla kala rai ban pynsangeh noh ia ka jingshna ia ka smart road jong ka Smart City Project.
U iathuh ba ia kane ka project (smart road) la shem ba kam iahap satia ban pyntreikam namar kiba bun ki daw.
“Ngi la rai ban pynsangeh noh ia ka project khnang ba ngin lah wanrah da ki jingtyrwa ba thymmai na ka tnad PWD. Ngin dang ban mang pisa ia kane hynrei ha une u snem ba mynta, ngin sa ioh ia ki surok kiba bha” kular u bah Sniawbha.
Haba kylli, u Symbud Myntri Rangbah ula pyntip ruh ba ka Tnad PWD kala ithuh lut ia baroh ki jaka ba sahkut um bad ki dang pynkhreh ia ki jingdonkam ban weng noh ia kane ka jingeh.
