Aizawl, Lber 15 : Kawei pat ka sienjam ka ban sahkynmaw na ka bynta ka jylla Mizoram, khamtam na ka bynta ki nongrep na ka liang u Myntri ka rep ka riang u Pu C. Lalrinsanga ha ka 14 tarik mynta u bnai u la kaweh ia ka lama na ka bynta 7.5 ton u sohmynken ‘Bird’s Eye Chilli’ ba la pynmih da ki nongrep na Lunglei, Siaha bad na Lawngtlai District ha ka thain shathie ka Mizoram ia uba la pynkhreh ban shalan shapoh United States of America.
Ia une u sohmynken yn pynpoi sha Vishakhapatnam, Andhra Pradesh bad nangne yn phah sha Nevada, USA.Kane ka dei ruh ka sienjam kaba hap hapoh ka Mission Organic Value Chain Development for North Eastern Region (MOVCD-NER) ia kaba la pyntreikam da ka International Competence Centre for Organic Agriculture (ICCOA) bad ka Mission Organic Mizoram (MOM), Department of Agriculture.
Haba kren ha ka jingialang ba lyngkot, u myntri ka rep ka riang u la ai khublei kyrpang ia ka Farmer Producer Companies (FPCs) halor ka jinglah ban pynlong ia kane ka projek kaba seisoh, bad u la ai khublei ruh ia ka ICCOA bad ka MOM halor ka jingshim khia bad ka jingkut jingmut ban pyniaid shakhmat ia kane ka projek.
Nalor kata u la ong ruh ba ka jingseisoh jong kane ka projek ka pynpaw halor ka ka jingiatreilang hapdeng ki nongrep ha Mizoram.Ha kajuh ka por u pynshlur ruh ia ki heh ka tnat ka rep ka riang kumjuh ia ki paid nongrep ba kin iai bteng ban pynleit jingmut ha ka rukom rep kaba khlem ai dawai khnang ba yn nang lah shuh shuh ban shalan ia ki mar rep ba la pynmih na Mizoram shabar jong ka ri ha ka dor kaba kham heh.
