Aizawl, Nailur 02 : U Myntri ka tnat ka rep ka riang ka Mizoram, u C Lalrinsanga hynne ka sngi ula kaweh ia ka lama na ka bynta ka jingshalan ia kumba 15.7 metric ton u sohtrun ba khlem ai dawa sha Sonipat kaba hapoh ka jylla Haryana lyngba ka trok kaba la mih na ka nongbah Aizawl.
Ia kine ki sohtrun la lum bad pynbit pynbiang da ka kompeni Tuichangral Organic FPC Limited ha ka thain mihngi ka Mizoram hapoh Khawzawl district.Ha u bnai ba la dep, ka Mizoram kala shalan ia u sohtrun uba dang shu kheit shapoh Dubai bad Bahrain ha ka sien kaba nyngkong eh.
Haba kren ha katei ka sngi, u C. Lalrinsanga ula ong ba ka don ka jingdawa kaba jur bha ia ki jhur ki jhep bad ki soh ba la pynmih na Mizoram ha kiwei pat ki bynta jong ka ri.Ula ong ruh ba ka jylla ka dei ban nang pynkhlain shuh shuh ia ka jingpynmih khnang ban lah ban pyndap ia ki jingdawa jong ki briew kiba dei na shabar ka jylla.
Ula ong ruh ba ka jingshalan ia u sohtrun sha kiwei pat ki jylla bad ki ri kiba na shabar kan nang pynshlur bad ai mynsiem shuh shuh ia ka sorkar bad ia ki nongrep jong ka thain.
Da kaba pynpaw ba ka India ka dei kawei na ki ri kaba khraw tam ha ka iew kaba iadei bad ka bam ka dih ha ka pyrthei, ka Mizoram kan ym shem jingeh na ka bynta ban shalan ia ki mar rep ki jong ki shabar ka jylla na ka bynta ban kyntiew ia ka ioh ka kot bad ka roi ka par.Kumta ruh ula kyntu ia ki nongrep ba kin nang pynkhlain ia ka jingpynmih khnang ba kin lah ban pynjur shuh shuh ia ka jingshalan ka jong ki.
Ha katei ka jingialang la ia don lang ruh u MLA ka sorkar synshar Mizo National Front (MNF) u Dr ZR Thiamsanga uba la ong ba ka thong ba kongsan eh jong ka sorkar ka long ha kaba iadei bad ki paid nongrep.
Ula ong ruh ba ka jingialang ba dang shen jong ki myntri kala shah na ka bynta ban shna wine lyngba ki soh grape rongktieh kiba ki pynmih hi bad ia kiba la die laitluid ha ki jaka iew.
Ia ka kompeni Tuichangral Organic FPC Limited la seng da ka kynhun jong ki 500 ngut ki nongrep sohtrun na ki phra tylli ki shnong kiba hap hapoh Khawzawl district ha ka snem 2021 bad kaba hap hapoh ka tnat Agriculture Mission Organic Mizoram.
