Guwahati, Naitung 07: Ka Director jong ka documentary phlim ‘Kaali,’ ka ba don ia ka dur postar jong ka Blei Kaali ka ba dih sikret ka la shah ujor da ka FIR hapoh ka police station ha Guwahati, Assam
Ia kane ka FIR halor kane ka dur postar ka ba la pynmih ia shibun ki jingkynthoh la ujor ryngkat lang da ka Hindu Suraksha Manch bad ka United Trust of Assam. Katkum ka FIR ba la ujor pyrshah ia ka Leena Manimekalai la ong ba kane ka dur postar ka la ktah jur ia ka jingngeit niam.
Ha kane ka FIR ba la ujor hapoh Dispur police station ha Guwahati, Assam la pynpaw ruh ba kane ka dur postar jong kane ka documentary ‘Kaali’ ka pyni ruh ia ka Blei Kaali ha kata ka rukom ka bym lah satia ban pdiang da kino kino ki riewngeit Hindu.
“Kam dei kaei kaei ruh hynrei ka jingpynjah burom ia ka niam Hindu bad ia ka kolshor da ka jingthmu khnang ban peit ibein ia ka jingsngew jong ki paid Hindu,” ong katei ka FIR.
Kine ki artylli ki kynhun seng ki la pynpaw ruh ha katei ka FIR da ka ba ong ba dei ban shim mardor ia ki lad jingpynshitom. Kane ka postar ka la wanrah ruh ka jingkhih bitar hapdeng ki paid Hindu ha ka ba bun na ki kynhun seng niam Hindu ki la pynpaw ka jingpyrshah ka ba jur halor ka ba kum kane ka jingleh pynthohbria pyrshah ia ka Blei Kaali.
Ia kane ka documentary la pynring phlim da ka nongshna phlim na Canada, ka Leena Manimekalai. Ka Leena ka la pyllait ia kane ka dur postar jong ka documentary phlim ka ban wan lyngba ka social media hadien ba ka la pynmih ia kane ka jingkhihwin hapdeng ki paid Hindu.
Katkum katei ka dur postar la iohi ia ka briew ka ba riam ia lade kum ka Blei Kaali bad ka ba dang kbum ia u sikret ha ka shyntur.
Halor katei ka jingshah kynthoh pyrshah, na ka liang ka Leena ka la khot ia ki briew ba kin jied ia ka lynti jong ka jingieit ha ka jaka jong ka jingiashun.
