Dawa weng mardor ia u Nazir
Shillong, Nailur 11 : Ki nongtrei ba siew bainong sngi ha Secretariat Administrative Department (Naarat) ki dei kiba la thungkam tang da kaba shu phone khlem da kyndon ki kyndon da ki jingthoh, kaba plie lad ia ka jingthungkam briew lajong, kynnoh ka KHNAM ha ka sngi Thohdieng haba dawa ban weng mardor ia u Nazir.
Ka Khun Hynniewtrep National Awakening Movement (KHNAM), ha ka ujor sah u Myntri ka Tnad SAD, ka ong ba kat kum ka jubab RTI ka tnad kam shym la don satia ia ki kyndon ban khot trei ia ki nongtrei ba siew bainong sngi.
“Ia ki nongtrei ba siew bainong sngi la khot ban thungkam tang da kaba shu phone bad ka shong ha u Nazir ban rai iano ban phone bad iano ban nym phone” kynnoh u Working President ka KHNAM Bah Thomas Passah.
U Bah Thomas ula ong ba da ki sap ngut ki nongtrei la siew bainong sngi kat kum ka dor ba buh da ka Tnad Labour, hynrei hadien ba shimti une u Nazir ba mynta, ki nongtrei kiba la don 10 sngi ha ka jingshakri kila shah weng lut.
“Hadien ba une u Nazir ba mynta u shimti ia ka kam, ki nongtrei kiba la shakri palat ia ka 10 snem kila shah weng bad la bujli da ki briew kiba iajan bad u Nazir” ula kynnoh.
Ka KHNAM ka kam ba 10 ngut kum kine ki nongtrei kiba la shakri palat 10 snem kila shah pynduh ia ka RCW hapoh ka scheme 1996.
“Kine ki nongtrei kila shakri hok la palat 10 snem hynrei naba u Nazir u pyrshah ia ki, kila duh ia ka lad ban kamai na ka bynta ka iing ka sem” ong u bah Thomas.
U iathuh ba ka RTI ka pyni ba ka jingthungkam ka long kaba shipor na ki kam kiba lait bad la pynkut noh ynda ka thungkam pura, hynrei kane ka jingleh pat ka long kaba la leh da kaba shu jied briew.
“Ngi la pan RTI la bun tylli bad ngi la aiti ia ka jingthoh sha u Chief Secretary bad Secretary ka SAD haba khmih lynti ba kin shim ia ka sienjam ban pynbeit, hynrei ym shym la leh eiei satia” ong u Bah Thomas.
Haba dawa ban leh eiei, ka KHNAM ka ong “U Nazir ula don don bynta ha ki kam leh shiliang bad jied briew lajong, kumta na ka bynta ka jingbha ka synshar khadar, dei ban weng noh mardor ia u Nazir bad bujli da ki briew kiba trei bha bad ba lah ban trei ia ka kam”.
Ka KHNAM kala dawa ban thungkam biang ia ki 10 ngut ki nongtrei bad ai ia ka RCW kay kum ka Regular Casual Worker Scheme 1996.
